Qozog‘istonning Aqmo‘la viloyatida avtobus buzilishi oqibatida yo‘lda qolib ketgan O‘zbekiston fuqarolari evakuatsiya qilingani haqida xabar berilgan edi. O‘zbekistonning Qozog‘istondagi elchixonasi vaziyat nazoratga olinganini ma’lum qildi.
15-fevral kuni Ostona—Chelyabinsk yo‘nalishida harakatlanayotgan yo‘lovchi avtobusi Jaqsi—Yesil—Buziliq yo‘lidagi Jaqsi qishlog‘i yaqinida buzilib qolgandi.
Aqmo‘la viloyat Favqulodda vaziyatlar departamenti bergan xabarda evakuatsiya qilingan o‘zbekisonliklar soni 64 nafar shundan 17 nafari bolalar ekani keltirilgandi. Elchixona bergan ma’lumotga ko‘ra, jami evakuatsiya qilingan 64 kishining 27 nafari o‘zbekistonlik bo‘lgan. Shundan 12 nafari bolalar.
Ularning barchasi Jaqsi qishlog‘idagi maktabda joylashgan isinish joyiga olib borilib, issiq ovqat bilan ta’minlangan. Yo‘lovchilar tibbiy yordamga muhtoj bo‘lmagan.
Elchixona vaziyat nazoratga olinganini, Aqmo‘la viloyati hokimligi, politsiya va Favqulodda vaziyatlar boshqarmalari bilan aloqada ekanini bildirdi.
Shu bilan birga, ob-havo sharoiti yomonlashgani sababli Qozog‘istonning 11 viloyatida respublika ahamiyatiga molik yo‘llarning 46 ta uchastkasida avtotransport vositalari harakatiga cheklov kiritilganini, havo harorati 30-35 daraja sovuqqacha pasayishi kutilayotganini ma’lum qildi.
Shu munosabat bilan elchixona O‘zbekiston fuqarolaridan noqulay ob-havo sharoitida safarga chiqmasliklarini so‘radi.
Izoh (0)