Jurnalistika va ommaviy kommunikatsiyalar universiteti rektori Sherzodxon Qudratxo‘ja AlterEgo loyihasiga bergan intervyusida bosh vazir matbuot kotibi lavozimida ishlagan davrlari haqida gapirib berdi.
“U vaqtda bosh vazir ommaviy shaxs emas edi. Uni televizor orqali umuman ko‘rsatish mumkin emasdi, u haqda hech narsa yozilmas, gapirilmas edi. Professional matbuot kotibi sifatida ishlagan men kabi inson u yerda ishlay olmasligimni bilib yuborishdi.
Mart oyining boshlarida hukumatga o‘zimga kelganimda ular nima ishlar qilishini, bosh vazir qanaqa masalalar bilan shug‘ullanishini ko‘rgach, 5 yil u yerda (prezident apparatida — tahr.) hech ish qilmaganimni tushundim… Chunki o‘sha yili qayerdadir zilzila bo‘lgandi, bosh vazir u yerga uchib ketib, muammoni hal qilyapti, yana qayerdadir texnogen falokat yuz beryaptimi, bosh vazir o‘sha yerda. Masalan, aholini, deylik, go‘sht, gaz, elektr bilan ta’minlash masalalari… bosh vazirning hamma tadbirlari rejasiga daqiqama-daqiqa kiritilgan edi. Men bu oqimga qo‘shildim, ishimdan zavq ola boshladim, chunki men uning nima qilayotganini ko‘rardim”, — deya eslaydi Sherzodxon Qudratxo‘ja.
Uning so‘zlariga ko‘ra, Shavkat Mirziyoyev hech qachon kabinetda o‘tirmagan. Bir safar O‘zbekistonning birinchi prezidenti xorijga uchib ketganida, bosh vazir oddiy mashinaga o‘tirib, Chilonzorga jo‘nab ketgan.
“Yordamchisi qo‘ng‘iroq qilib, Sherzod, Chilonzorga keling, dedi. Yetib borganimda ularni tanimay qoldim, (bosh vazir) yerto‘laga tushgan, hamma joydan suv oqib yotibdi. Sherzod, buni buni tasvirga ol, dedilar. Shundan keyin barcha tumanlarning hokimlarini to‘plab, Chilonzorning bu yeridan suv oqyapti, bu yerning tom qismiga shikast yetgan, bu yerda elektr energiyasi yo‘q, deb barcha masalalar bilan shug‘ullandilar”, — deydi u.
Avvalroq Sherzodxon Qudratxo‘ja bitta materiali televideniye orqali efirga uzatilmasligi uchun 50 ming dollar pul taklif qilishgani haqida aytib bergandi.
Izoh (0)