Jurnalistika va ommaviy kommunikatsiyalar universiteti rektori Sherzodxon Qudratxo‘janing rusiyzabonlar haqidagi gaplaridan so‘ng “Rossotrudnichestvo” u bilan barcha aloqalarni to‘xtatdi. Bu haqda “Rossotrudnichestvo” rahbari Yevgeniy Primakov ma’lum qildi.
Sherzodxon Qudratxo‘ja Alter Ego loyihasiga bergan intervyusida o‘zi yashayotgan mamlakat tilini bilmaydiganlar “bosqinchi yoki ahmoq” bo‘lishini aytgandi.
“Karl Marks ta’kidlaganidek, o‘zi yashayotgan mamlakatning tilini bilmaganlarni ikki xil toifaga ajratish mumkin: birinchisi — bosqinchi, ko‘p odamlarning ongida ular bosqinchidir, ikkinchisi — bu ahmoq, o‘ylay olmaydigan, o‘qiy olmaydigan odam. Xafa bo‘lishmasin, shunday ekan, o‘zlari bir xulosa chiqarsinlar, ular bosqinchimi yoki ahmoqmi?”, — degan u.
Shundan so‘ng “Rossotrudnichestvo” rahbari Yevgeniy Primakov Sherzod Qudratxo‘ja bilan har qanday muloqot va aloqalarni to‘xtatganini e’lon qildi.
“Ishonchim komilki, janob Qudratxo‘ja nafaqat o‘zi, balki yaqinlari ham Rossiyada o‘qish, u bilan foydali biznes yuritish, stajirovkada qatnashish va boshqa imkoniyatlarni qo‘lga kirita olmasa, hatto o‘zi yoqtirmaydigan davlatga shunchaki tashrif buyura olmasa ham, xafa bo‘lmaydi”, — dedi Yevgeniy Primakov.
Uning so‘zlariga ko‘ra, “Rossotrudnichestvo” Qudratxo‘ja uzr so‘ramaguncha, u bilan, shuningdek, o‘zi rahbarlik qilayotgan tuzilmalar bilan har qanday muloqot va aloqalar to‘xtatiladi.
Ma’lumot uchun, “Rossotrudnichestvo” — MDH davlatlari, xorijda yashovchi vatandoshlar ishlari va xalqaro gumanitar hamkorlik bo‘yicha Rossiya federal agentligi.
Izoh (0)