“Materialim efirga ketmasligi uchun 50 ming dollar taklif qilishgan” — Sherzodxon Qudratxo‘ja

Jurnalistika va ommaviy kommunikatsiyalar universiteti rektori Sherzodxon Qudratxo‘ja AlterEgo loyihasiga bergan intervyusida O‘zbekiston mustaqillikka erishganining ilk yillarida axborot erkinligi qanday bo‘lgani to‘g‘risidagi savolga javob qaytardi.

Sherzodxon Qudratxo‘ja 1994-yildan boshlab O‘zbekiston Milliy teleradiokompaniyasida ishlashni boshlagan. 1998-yilda esa UzTV4 telekanali direktori bo‘lgan. Uning so‘zlariga ko‘ra, mustaqillikning ilk yillarida “Axborot” informatsion dasturi ancha qiziq bo‘lgan. Biroq 1997-1998-yillardan boshlab ishlash biroz qiyinlashgan.

“1997-yilda zapravkalardan benzinni to‘liq quymayotganliklari haqida lavha tayyorlagandim, u vaqtlar bu barchaning muammosi edi. Shu materialim efirga chiqmadi. Uning efirga chiqmasligi evaziga katta pullar — 50 ming dollargacha pul taklif qilishdi. Ular o‘ziga xos mafiya edi.

Bundan maqsad muammo davlat rahbariga yetib bormasligida edi… Oxir-oqibat bu material 8-martda, yakshanba kuni, davlat rahbari shahardan tashqariga chiqib ketganida efirga uzatildi. O‘sha vaqtda menga qiyin bo‘lgandi”, — deydi Qudratxo‘ja.

Uning aytishicha, televideniyega tegishli transport vositasiga 70 litr benzin uchun pul to‘langanida, 16-17 litr kam quyilgan.

Sherzodxon Qudratxo‘janing so‘zlariga ko‘ra, benzin muammosi bo‘yicha efirga ketgan lavhani Vazirlar Mahkamasi rahbarining birinchi o‘rinbosari lavozimida ishlagan Ismoil Jo‘rabekov ko‘rgan va muammoga qarshi qattiq chora ko‘rgan.