Ayni vaqtda Shavkat Mirziyoyev raisligida agrar sohadagi ustuvor vazifa va rejalarga bag‘ishlangan yig‘ilish bo‘lib o‘tmoqda. Yig‘ilishda 2024-yildan ilk bor chetdan olib kelingan chigitni ekishga ruxsat berilgani ma’lum qilindi.
Qayd etilishicha, shu paytgacha Paxtachilik kengashi, Karantin agentligi, viloyat hokimlari bir to‘xtamga kelib, qayerdan, qanday navli urug‘ olib kelib, qayerga ekishni hal qilmagan.
Shu munosabat bilan bir oy muddatda xorijdan 3 ming tonna urug‘lik chigitni olib kelish topshirildi. Umuman, 2024-yilda 100 ming gektarda yuqori hosildor xorijiy paxta navlarini ekish muhimligi taʼkidlandi.
O‘tgan yili g‘alla hosili ilk bor 8 million tonnaga yetdi. Fermerlar manfaatdorligini yanada oshirish uchun bu yil g‘allachilikda ham yangiliklar qilinishi taʼkidlandi. Joriy yilda paxtadagi kabi g‘allada ham imtiyozli kreditni to‘g‘ridan to‘g‘ri fermerga berish tizimi joriy qilinadi.
Bundan tashqari, davlat resursi uchun xarid qilingan bug‘doyni daladan tashib kelish va saqlash xarajati 2024-yilda ham to‘liq budjetdan qoplanadi.
O‘zbekistonda 2024-yil hosili uchun 1 million gektar maydonlarda g‘o‘za navlari ekish rejalashtirilgan. Ushbu g‘o‘za navlarini ekish uchun 50 ming tonna urug‘lik chigit talab etiladi. G‘o‘za navlarining iqlim sharoitiga mos 22 ta ertapishar, 3 ta o‘rtapishar, 4 ta ingichka tolali hamda 24 istiqbolli va yangi navlarni ekish rejalashtirilgan.
Izoh (0)