Айни вақтда Шавкат Мирзиёев раислигида аграр соҳадаги устувор вазифа ва режаларга бағишланган йиғилиш бўлиб ўтмоқда. Йиғилишда 2024 йилдан илк бор четдан олиб келинган чигитни экишга рухсат берилгани маълум қилинди.
Қайд этилишича, шу пайтгача Пахтачилик кенгаши, Карантин агентлиги, вилоят ҳокимлари бир тўхтамга келиб, қаердан, қандай навли уруғ олиб келиб, қаерга экишни ҳал қилмаган.
Шу муносабат билан бир ой муддатда хориждан 3 минг тонна уруғлик чигитни олиб келиш топширилди. Умуман, 2024 йилда 100 минг гектарда юқори ҳосилдор хорижий пахта навларини экиш муҳимлиги таъкидланди.
Ўтган йили ғалла ҳосили илк бор 8 миллион тоннага етди. Фермерлар манфаатдорлигини янада ошириш учун бу йил ғаллачиликда ҳам янгиликлар қилиниши таъкидланди. Жорий йилда пахтадаги каби ғаллада ҳам имтиёзли кредитни тўғридан тўғри фермерга бериш тизими жорий қилинади.
Бундан ташқари, давлат ресурси учун харид қилинган буғдойни даладан ташиб келиш ва сақлаш харажати 2024 йилда ҳам тўлиқ бюджетдан қопланади.
Ўзбекистонда 2024 йил ҳосили учун 1 миллион гектар майдонларда ғўза навлари экиш режалаштирилган. Ушбу ғўза навларини экиш учун 50 минг тонна уруғлик чигит талаб этилади. Ғўза навларининг иқлим шароитига мос 22 та эртапишар, 3 та ўртапишар, 4 та ингичка толали ҳамда 24 истиқболли ва янги навларни экиш режалаштирилган.
Изоҳ (0)