Senatning Agrar va suv xo‘jaligi masalalari qo‘mitasi majlisida “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid Davlat dasturi loyihasi muhokama qilindi. Bu haqda Senat matbuot xizmati xabar berdi.
Davlat dasturi loyihasining “Barqaror iqtisodiy o‘sish orqali aholi farovonligini taʼminlash” yo‘nalishi doirasida paxta va g‘alla ekinlari hosildorligini oshirish, jumladan, paxta hosilini o‘rtacha 45-50 sentnerga, g‘alla bo‘yicha 80-100 sentnerga yetkazish maqsad qilingan. Shuningdek, paxtada 5 ta va g‘allada 8 ta yangi tezpishar, serhosil navlarni tanlash va joylashtirish, tanlab olingan navlar maydonini har yili kamida 10 foizga kengaytirib borish, zamonaviy resurs tejamkor texnologiyalarni paxta va g‘alla maydonlarining 40-50 foizida joriy etish, olimlarni agroklasterlarga biriktirish hamda ilmiy asoslangan tavsiyalar berish, tuproq unumdorligi past bo‘lgan paxta maydonlarida almashlab ekish tizimini kengaytirish nazarda tutilgan.
Chorvachilikda yillik o‘sish surʼatini kamida 3,8 foizga yetkazish, ipak mahsulotlari ishlab chiqarish hajmini 1,2 barobarga, eksportni hajmini 1,5 barobarga oshirish, agrar sohani zamonaviy qishloq xo‘jaligi texnikalari bilan taʼminlash choralarini ko‘rish kabi masalalar dastur loyihasiga kiritilgan.
Dastur loyihasida quvvati 45 ming tonna bo‘lgan 11 ta agrologistika markazi faoliyatini yo‘lga qo‘yish, qishloq xo‘jaligida xavfli pestitsidlardan foydalanishni tartibga solish, meva-sabzavot mahsulotlari eksport hajmini kamida 2,5 mlrd dollarga yetkazish belgilangan.
Majlisda dastur loyihasida oziq-ovqat xavfsizligini taʼminlash va ekinlardan yuqori hosil olishni taʼminlashga hamda qishloq xo‘jaligida yangi ish o‘rinlarini yaratishga qaratilgan masalalarga ham eʼtibor qaratilganligi taʼkidlandi. Jumladan, oziq-ovqat mahsulotlarini ishlab chiqarish hajmini 100 trln so‘mdan oshirish, yaʼni joriy yilda qishloq xo‘jaligi mahsulotlarini qayta ishlash darajasini 25 foizdan oshirish, jumladan, meva-sabzavotni 3,2 mln tonnaga, go‘shtni 450 ming tonnaga, sutni 3 mln tonnaga hamda oziq-ovqat mahsulotlari ulushini 40 foizga yetkazish rejalashtirilgan.
Shu bilan birga, xususiy sektor bilan hamkorlikda 13 ta yangi o‘simliklar klinikasini, aholi xonadonlarida biolaboratoriyalarning 400 ta mavsumiy shoxobchalarini tashkil etish orqali 1 200 ta yangi ish o‘rinlarini yaratish ko‘zda tutilgan.
Senatorlar tomonidan bugungi kunda butun dunyoda dolzarb bo‘lib borayotgan suv tanqisligining oldini olish, suvdan oqilona foydalanish madaniyatini va suv ishlatish samaradorligini oshirish borasida dastur loyihasida belgilangan vazifalar muhimligi taʼkidlandi.
Xususan, 1,5 ming kilometr yirik kanallarni betonlashtirish, 6 113 ta suv xo‘jaligi obyektida suv hisobini real vaqt rejimida kuzatish imkonini beruvchi qurilmalarni o‘rnatish, 2 647 ta meliorativ kuzatuv qudug‘ida sizot suvlari sathi monitoringini avtomatlashtirilgan tizimga o‘tkazish nazarda tutilgan.
Qizg‘in muhokamalar jarayonida senatorlar, ekspertlar guruhi aʼzolari hamda mutaxassislar tomonidan Davlat dasturi loyihasiga bir qator taklif va tavsiyalar berildi.
Izoh (0)