Respublikaning barcha aholi yashash punktlari to‘liq xatlovdan o‘tkazilgan va undan 10 mingdan ortiq aholi yashash punktidan 1 113 tasi jamoat transporti bilan qamrab olinmagani aniqlangan. Bu haqda Transport vazirining birinchi o‘rinbosari Mamanbiy Omarov O‘zAga bergan intervyusida aytib o‘tgan.
Maʼlum qilinishicha, shulardan 1 081 tasiga esa transportlar qatnovi qo‘yilgan. Qolgan 32 ta aholi punktiga olib boruvchi yo‘l qamrab olinmaganiga sabaи – yo‘l sifati harakatlanish xavfsizligi talablariga javob bermaydi.
“Yana bir jihat – mavjud yo‘nalishlarda harakatlanayotgan aksariyat transport vositalarining sig‘imi, qulayligi va xavfsizligi talablarga javob bermaydi. Masalan, bugungi kunda respublika bo‘yicha “Damas”ning ulushi 72 foizni tashkil etadi.
Mavjud yo‘nalishlardagi transport vositalarining yangilanishi (10 yildan ortiq), sig‘imini oshirish (“Damas”ni avtobus va mikroavtobuslar bilan almashtirish), faoliyat yuritmayotgan yo‘nalishlarni qamrab olish uchun qo‘shimcha 4 200 dan ortiq avtobus, 5 500 dan ortiq mikroavtobusga ehtiyoj mavjudligi aniqlandi. Bugungi kunda aholi talablaridan kelib chiqqan holda har bir hudud kesimida mavjud yo‘nalishlar qayta ko‘rib chiqilib, yangi yo‘nalishlar tarmoqlari ishlab chiqildi”, – deydi transport vazirining birinchi o‘rinbosari.
Taʼkidlanishicha, 2024-yildagi eng asosiy vazifa – hududlar jamoat transporti uchun 2 ming dona avtobus va 2 ming dona mikroavtobus xarid qilishni taʼminlash.
Izoh (0)