Shavkat Mirziyoyev raisligida o‘tkazilayotgan yig‘ilishda viloyatlarga 2024-yilda 1 200 ta avtobus va elektrobus olib kelish vazifasi qo‘yildi.
Yig‘ilishda davlat rahbari jamoat transporti haligacha odamlarga sifatli xizmat ko‘rsatadigan tizimga aylanmaganini qayd etdi.
“Jamoat transporti qamrovi bor-yo‘g‘i 25 foiz ekani — bu tizimga berilgan baho” — dedi prezident.
Viloyatlarga yetkazilishi reja qilingan avtobuslarning hammasi ham olib kelinmagani, Andijon, Samarqand, Namangan, Qarshi va Urganch shaharlarida yo‘lovchi tashishni brutto-shartnoma asosida moliyalashtirish tizimini joriy qilish ishlari yakuniga yetkazilmagani tanqid qilindi.
Transport vaziri va viloyat hokimlari bu ishlarni to‘liq yakunlab, 1-martga qadar 5 ta viloyat markazida, 1-iyungacha qolgan 8 ta shaharda yangi tizimni yo‘lga qo‘yishi shartligi qat’iy ko‘rsatib o‘tildi.
Shuningdek, pandemiya davrida temiryo‘l qatnovlari 2 karra qisqargani oqibatida qish kunlari odamlar chet elga mashina yoki avtobusda ketishga majbur bo‘layotgani, qishda yo‘llarda noxush holatlar ro‘y berayotganiga to‘xtaldi.
Transport vazirligi tizimidagi tegishli korxonada xalqaro qatnovlar uchun 167 ta avtobus bo‘lgani bilan, korxona xususiy sektor va qo‘shni davlatlar tashuvchilari bilan raqobat qila olmayotgani qayd etildi.
Shu munosabat bilan kompleks rahbariyatiga chet ellik hamkorlari bilan muzokara o‘tkazib, temiryo‘l qatnovlarini pandemiyagacha bo‘lgan raqamlarga yetkazish topshirildi.
Xalqaro avtobusda tashishlar sohasiga xususiy sheriklarni jalb qilish va raqobatni rivojlantirish zarurligi ta’kidlandi.
Izoh (0)