Аввалроқ, 2023 йил 26 ноябрь куни Тошкент вилояти Янгийўл туманида аёл кишининг ток уриши оқибатида вафот этгани ҳақида хабар қилинган эди. Ҳолат юзасидан Бош прокуратура ахборот хизмати раҳбари Ҳаёт Шамсутдинов “Дарё”га изоҳ берди.
Айтилишича, 1989 йилда туғилган И.В. симёғочдан узилиб ерга тушган электр симидаги юқори кучланишли электр токи таъсирида тан жароҳати олиб, Янгийўл шаҳар марказий касалхонаси жонлантириш бўлимида кўрсатилган тиббий муолажаларга қарамай вафот этган.
Янгийўл шаҳар судга оид тиббий экспертизанинг дастлабки маълумотномасига кўра, аёл ўлимига танасининг 45-50 фоиз куйиши, куйиш шоки, икки томонлама буйрак усти безларига қон қуйилиши сабаб бўлганлиги кўрсатилган.
Мазкур ҳолат юзасидан Янгийўл туман прокуратураси томонидан Янгийўл туман электр таъминоти корхонаси мансабдор шахсларига нисбатан Жиноят Кодексининг 207-моддаси 3-қисми “а” (мансабга совуққонлик билан қараш натижасида одам ўлишига сабаб бўлиш) банди билан жиноят иши қўзғатилган, — дейилади Бош прокуратура ахборотида.
Қўшимча қилинишича, Янгийўл туман электр таъминоти корхонаси мансабдор шахслари ҳаракатларига ҳуқуқий баҳо бериш мақсадида, “Ўзэнергоинспекция” Тошкент ҳудудий бўлимига хизмат текшируви ўтказиш тўғрисида тақдимнома киритилган.
Ҳозирда тергов ҳаракатлари давом этмоқда.
Изоҳ (0)