Muftiy shayx Nuriddin Xoliqnazarov Xalqaro musulmon donishmandlar kengashiga qabul qilindi. Bu haqda Musulmonlar idorasi axborot xizmati xabar berdi.
Unga ko‘ra, 9-fevral kuni Birlashgan Arab Amirliklarining Abu Dabi shahrida bo‘lib o‘tayotgan Musulmon donishmandlar kengashi yig‘ilishida O‘zbekiston musulmonlari idorasi raisi, muftiy Shayx Nuriddin Xoliqnazarov ushbu kengashga qabul qilingani e’lon qilindi. Musulmon donishmandlari kengashi raisi, Misr bosh imomi, al-Azhar majmuasi rahbari Shayx Ahmad Toyyib Shayx Nuriddin Xoliqnazarovni ushbu nufuzli kengash a’zoligiga qabul qilish haqidagi qarorni o‘qib eshittirdi.
Qayd etilishicha, Ahmad Toyyib o‘z so‘zida Markaziy Osiyo mintaqasida hozirgi kunda faoliyat olib borayotgan ko‘plab ulamolar orasidan faqatgina O‘zbekiston muftiysi a’zo qilinganiga alohida urg‘u qaratdi. Yig‘ilishda ishtirok etayotgan dunyoning yetakchi va taniqli ulamolari Nuriddin Xoliqnazarovni Musulmon donishmandlar kengashiga qabul qilingani tarixiy voqea bo‘lganini ta’kidlab, mamlakatdagi diniy-ma’rifiy sohadagi islohotlarni e’tirof etdi.
Izoh (0)