Qurilish va uy-joy kommunal xo‘jaligi vazirligi Sirdaryo viloyati Guliston shahrida qiyshiq qurilayotgan obyekt bo‘yicha ma’lumot berdi.
Ijtimoiy tarmoqlarda yoshlar uchun mo‘ljallangan obyektning beton ustunlari qiyshiq holda ko‘tarilgani tasvirlangan surat tarqaldi. Vazirlikka ko‘ra, mazkur obyekt Guliston shahar “Namuna” MFY Birlashgan ko‘chasida joylashgan “Yoshlar mehnat guzari” binosi.
Loyihachi — “Sirdaryo viloyati loyiha ishlab chiqarish boshqarmasi” MCHJ hisoblanib, obyekt 2022-yil 20-mart kuni №66-sonli ruxsatnoma bilan “Shaffof qurilish” milliy axborot tizimi ro‘yxatidan o‘tgan, ammo “Qurilishda davlat nazorati” milliy axborot tizimi orqali qayta ro‘yxatdan o‘tkazilmagan.
Holat viloyat Qurilish va uy-joy kommunal xo‘jaligi sohasida nazorat qilish inspeksiyasi hamda loyiha tashkiloti mutaxassislari tomonidan borib o‘rganilganda pudratchi tomonidan qurilishda quyidagi qoidabuzarliklarga yo‘l qo‘yilgani aniqlangan:
- obyektda malakali mutaxassis (prorab) mavjud emas;
- yashirin ishlarni guvohlash dalolatnomalari rasmiylashtirilmagan;
- poydevor osti ishlari uchun f-8 va “akt razbivka” hujjatlari mavjud emas;
- poydevorning beton ishlari notekis va tashqi vertikal gidroizolyatsiya ishlari sifatsiz bajarilgan;
- binoning 1-qavati 3—4- o‘qlari A-B kesishmasida tasdiqlangan loyiha hujjatlarida qavatlararo zinapoya va zinapoya maydonchalari o‘rni loyiha bilan kelishilmasdan o‘zboshimchalik bilan binoning konstruktiv holatiga o‘zgartirish kiritilgan;
- 3-qavatdagi ikkinchi o‘q B-B kesishmasidagi quyilgan temir-beton ustunlarning o‘zaro gorizontal va vertikal o‘qlardan 5-6 santimetr qochgan;
- beton uchun sinov — laboratoriya xulosalari pudratchi tomonidan taqdim etilmagan.
Bugungi kunda mazkur obyektda qurilish ishlari to‘xtatilib, buyurtmachiga ogohlantirish xati berilgan hamda ushbu noqonuniy qurilmani bartaraf etish yuzasidan sudga daʼvo arizasi kiritilgan.
Avvalroq Navoiyda fuqaro “dom”ga o‘zi uchun alohida lift o‘rnatayotgani aniqlangandi. Mulkdorga ko‘p kvartirali uyning umumiy mulkidan foydalanish qoidalari, bunda aholi oldiga qo‘yiladigan talablar tushuntirilgan va o‘zboshimchalik bilan qurilgan qurilmani bartaraf etish bo‘yicha tegishli tartibda majburiy ko‘rsatma berilgan.
Izoh (0)