Qurilish va uy-joy kommunal xo‘jaligi vazirligi Navoiyda ko‘p qavatli uylardan biriga mulkdor tomonidan lift o‘rnatilayotgani aytilgan xabarlarga munosabat bildirdi.
Qayd etilishicha, Navoiy viloyati Qurilish va uy-joy kommunal xo‘jaligi sohasida hududiy nazorat qilish inspeksiyasi tomonidan 29-yanvarida ijtimoiy tarmoqlarda aytilgan Navoiy shahri, Navoiy ko‘chasi 39 D-sonli ko‘p kvartirali uy o‘rganilgan.
Unga ko‘ra ushbu binoning 10-qavati (pentxaus)da joylashgan 2 ta 46 va 47-xonadonlarni xarid qilgan mulkdor binoning tashqi yon fasad qismidan faqatgina o‘zi foydalanishi uchun lift o‘rnatayotgani aniqlangan.
Mulkdor inspeksiyaning lift qurilmasini o‘rnatish yuzasidan asoslantiruvchi hujjatlar bo‘yicha so‘roviga tegishli tashkilotlar tomonidan imzolangan taklif loyihasini taqdim etgan. Mulkdorga ko‘p kvartirali uyning umumiy mulkidan foydalanish qoidalari, bunda aholi oldiga qo‘yiladigan talablar tushuntirilgan va o‘zboshimchalik bilan qurilgan qurilmani bartaraf etish bo‘yicha tegishli tartibda majburiy ko‘rsatma berilgan.
Holat yuzasidan 2024-yil 1-fevral kuni Navoiy shahar prokuraturasiga tegishli hujjatlar taqdim qilingan.
Maʼlumot uchun, “Ko‘p kvartirali uylarni boshqarish to‘g‘risida”gi qonunga ko‘ra ko‘p kvartirali uydagi umumiy joylar, tayanch va to‘siq konstruksiyalar, kvartiralar oralig‘idagi ihotalangan (o‘rama) pillapoyalar, zinapoyalar, liftlar, lift shaxtalari hamda boshqa shaxtalar, dahlizlar, texnik qavatlar, yerto‘lalar, cherdaklar va tomlar, uy ichidagi muhandislik tarmoqlari hamda kommunikatsiyalari, joylarning tashqarisida yoki ichida joylashgan va bittadan ortiq joyga xizmat ko‘rsatadigan mexanik, elektr, sanitariya-texnika uskunalari va qurilmalari hamda boshqa uskuna va qurilmalar umumiy mol-mulkdir. Umumiy mol-mulk joylarning mulkdorlariga umumiy ulushli mulk huquqi asosida tegishli hisoblanadi.
Eslatib o‘tamiz, 2023-yilning iyulida Toshkentdagi 10 qavatli uyning tomida o‘zboshimchalik bilan qo‘shimcha uy qurilayotgani aniqlangan edi.
Izoh (0)