Shavkat Mirziyoyev mahalla raislari maktabda tarbiya va davomat masalalari bilan qiziqmayotgani haqida gapirdi

Shavkat Mirziyoyev raisligida ijtimoiy sohadagi ustuvor vazifalarga bag‘ishlangan yig‘ilish boshlandi. Bu haqda prezident matbuot kotibi xabar berdi.

Qayd etilishicha, soha uchun masʼul 13 ta vazirlik va idora hamda 223 nafar hokim o‘rinbosarlari bor. Lekin taʼlim, tibbiyot, raqamlashtirish, madaniyat va sport sohalaridagi islohotlarning joylardagi ijrosini taʼminlashda kamchiliklar yo‘q emas.

Masalan, maktabgacha va maktab taʼlimida erishilgan katta o‘zgarishlar bilan bir qatorda bog‘cha bilan maktab, maktab bilan kollej va oliygoh o‘rtasida uzviylik yetarli darajada emas.

Mahalla raisi maktabda tarbiya va davomat masalalari, ota-onalar bilan hamkorlik qilish bilan qiziqmasa, tuman hokimlari, yoshlar va ijtimoiy masalaga masʼul o‘rinbosarlari maktabda maʼnaviyat va sport tadbirlarini tashkil etishga eʼtiborsiz bo‘lmoqda.

“Shu bois o‘tgan hafta maktabgacha va maktab taʼlimi vaziriga yangi o‘rinbosarlar tayinlandi. Ularning oldiga taʼlim, tarbiya va maʼnaviyat bo‘yicha maktablarga yangi muhit olib kirish vazifasi qo‘yildi”, — deyiladi xabarda.

Avvalroq Sardor Rajabov va Farhod Boqiyev maktabgacha va maktab ta’limi vaziri o‘rinbosarlari lavozimiga tayinlangani to‘g‘risida xabar berilgandi.