Bosh prokuratura matbuot kotibi Farg‘ona viloyati Dang‘ara tumanida joylashgan avtomobillarga gaz to‘ldirish shoxobchasida fuqarolar o‘rtasida sodir bo‘lgan janjal yuzasidan ma’lumot berdi.
Ma’lum qilinishicha, 3-fevral kuni Dang‘ara tumanida joylashgan avtomobillarga gaz to‘ldirish shoxobchasida uch nafar shaxs o‘zaro janjallashgan. Shu paytda bezorilikni oldini olish maqsadida, ularni ajratish uchun kelgan 23 yoshli boshqa shaxsga ham faol qarshilik ko‘rsatilgan. Birozdan so‘ng, ushbu shaxs xushini yo‘qotgan va shifoxonaga olib borilayotgan vaqtida vafot etgan.
Olib borilgan tergov oldi tekshirish harakatlari davomida Dang‘ara tumani IIB huzuridagi tergov guruhi tomonidan ikki nafar shaxsga nisbatan Jinoyat kodeksining 277-moddasi (bezorilik) bilan jinoyat ishi qo‘zg‘atilgan va ular protsessual tartibda ushlangan.
“Marhumning o‘limi yuzasidan Dang‘ara tumani prokuraturasi tomonidan tergovga qadar tekshirish harakatlari olib borilmoqda. Uning o‘lim sababini aniqlash maqsadida sudga oid tibbiy ekspertiza tayinlangan. Tergov va tekshirish harakatlari har tomonlama, to‘liq va xolisona o‘tkazilishi va natijasi bo‘yicha qonuniy qaror qabul qilinishi taʼminlanadi”, — deyiladi xabarda.
Eslatib o‘tamiz, 2022-yil dekabrda Ohangarondagi gaz quyish shoxobchasida janjal sodir bo‘lgandi. O‘rganishlar natijasida voqea avtomobillarga gaz quyish jarayoni yoki u yerda navbat talashgan haydovchilar bilan bog‘liq emasligi aniqlangan edi.
Izoh (0)