Qashqadaryo viloyati Kitob tumanida Damas YPX xodimini bosib ketgani aks etgan videolar tarqaldi. Yo‘l harakati xavfsizligi xizmati holat bo‘yicha ma’lumot berdi.
Ma’lum qilinishicha, holat 31-yanvar kuni soat 16:35 larda Kitob tumani hududidan o‘tuvchi Kitob—Shahrisabz avtomobil yo‘lining 3-kilometrida sodir bo‘lgan. Viloyat YHXB yo‘l-patrul xizmati xodimi N.Musinov davlat raqam belgisi bo‘lmagan Damas haydovchisining me’yoriy hujjatlarini tekshirish maqsadida to‘xtash haqidagi ishorani bergan vaqtda haydovchi to‘xtamasdan, transport vositasini xodimning ustiga boshqarib yuborgan.
Atrofda bo‘lgan fuqarolar yordamida avtomobil ostidan olib chiqilgan YPX xodimi N.Musinov shifoxonaga olib borilgan. Kitob tumani tibbiyot birlashmasi tomonidan berilgan dastlabki ma’lumotga ko‘ra, N.Musinovda boshi, yuzi, qo‘li va oyoqlarida shilingan, qirilgan jarohatlar borligi ma’lum qilingan.
Holat yuzasidan Kitob tumani prokuraturasi tomonidan tergovga qadar tekshiruv harakatlari olib borilmoqda.
Izoh (0)