Қашқадарё вилояти Китоб туманида Damas ЙПХ ходимини босиб кетгани акс этган видеолар тарқалди. Йўл ҳаракати хавфсизлиги хизмати ҳолат бўйича маълумот берди.
Маълум қилинишича, ҳолат 31 январь куни соат 16:35 ларда Китоб тумани ҳудудидан ўтувчи Китоб—Шаҳрисабз автомобиль йўлининг 3-километрида содир бўлган. Вилоят ЙҲХБ йўл-патрул хизмати ходими Н.Мусинов давлат рақам белгиси бўлмаган Damas ҳайдовчисининг меъёрий ҳужжатларини текшириш мақсадида тўхташ ҳақидаги ишорани берган вақтда ҳайдовчи тўхтамасдан, транспорт воситасини ходимнинг устига бошқариб юборган.
Атрофда бўлган фуқаролар ёрдамида автомобиль остидан олиб чиқилган ЙПХ ходими Н.Мусинов шифохонага олиб борилган. Китоб тумани тиббиёт бирлашмаси томонидан берилган дастлабки маълумотга кўра, Н.Мусиновда боши, юзи, қўли ва оёқларида шилинган, қирилган жароҳатлар борлиги маълум қилинган.
Ҳолат юзасидан Китоб тумани прокуратураси томонидан терговга қадар текширув ҳаракатлари олиб борилмоқда.
Изоҳ (0)