Germaniyada to‘rt kunlik ish haftasiga o‘tish bo‘yicha tajriba boshlandi, deb xabar bermoqda Bloomberg. 1-fevraldan boshlab 45 ta kompaniya pilot loyihaga qo‘shiladi. Tajriba olti oy davom etadi.
Ushbu kompaniyalar xodimlari doimgidek miqdorda maosh oladi, lekin haftada bir kun kamroq ishlaydi. Loyihaning asosiy maqsadi ish haftasini qisqartirish xodimlarning mehnat unumdorligini oshirishga olib keladimi yoki yo‘qligini aniqlashdan iborat.
Solidsense kompaniyasi asoschilaridan biri va loyiha ishtirokchisi Syoren Frike bunday investitsiyalar xodimlarning farovonligini, motivatsiyasini va shu orqali samaradorligini oshirishi mumkinligiga ishonch bildirdi.
Ta’kidlanishicha, malakali kadrlar yetishmasligi va yuqori inflyatsiya ishchilarni ish haqini oshirishni talab qilishga va pandemiya davrida erishgan moslashuvchanlik va mustaqillikni saqlab qolishga majbur qilmoqda. Germaniyada yaqinda poyezd mashinistlari ish haqini saqlab qolgan holda ish vaqtini haftasiga 38 soatdan 35 soatga qisqartirishni talab qilib, olti kunlik ish tashlash e’lon qildi. Qurilish kasaba uyushmalari ish haqini 20 foizdan ortiq oshirishni talab qilmoqda. Prognozlarga ko‘ra, 2035-yilga kelib Germaniya mehnat bozori tug‘ilishdagi muammolar va keksaygan aholi sharoitida immigratsiya bilan bog‘liq muammolar tufayli 7 milliondan ortiq odamni yo‘qotishi mumkin.
Jahon sog‘liqni saqlash tashkiloti (JSST) va Xalqaro mehnat tashkiloti (XMT) tomonidan o‘tkazilgan tadqiqot shuni ko‘rsatdiki, uzoq ish vaqti sog‘liq uchun jiddiy xavf tug‘diradi, bu insult va yurak kasalliklariga olib keladi va har yili yuz minglab odamlarning o‘limiga sabab bo‘ladi. Xususan, 2016-yilda 745 ming kishining insult va yurak-qon tomir kasalliklaridan vafot etishiga uzoq ish vaqti sabab bo‘lgan. Bu ko‘rsatkich 2000-yilga nisbatan 29 foizga ko‘p, bu uzoq ish vaqtining sog‘liq uchun xavf darajasi oshganini ko‘rsatadi.
Izoh (0)