Shimoliy Koreya rasmiylari 30-yanvar kuni yadroviy qurol olib yurishga qodir Hwasal-2 strategik qanotli raketasini uchirish bo‘yicha mashg‘ulotlar o‘tkazganini da’vo qilmoqda. Bu haqda Janubiy Koreyaning Yonhap axborot agentligi xabar berdi.
Rasmiy Pxenyanning qayd etishicha, raketaning Sariq dengiz yo‘nalishida uchirilishi “qo‘shni davlat xavfsizligiga salbiy ta’sir ko‘rsatmagan”.
Janubiy koreyalik mutaxassislar Shimoliy Koreya tomoni taqdim etgan fotosuratlarni tahlil qilib, Hwasal-2 (koreyscha “o‘q”) past balandlikda uchganini payqashdi.
Raketaning to‘q rangli korpusida oq chiziqlar bo‘lgan, bu ilgari uchirilgan Hwasal-1 raketasini eslatadi.
Shimoliy Koreya Hwasal-1 va Hwasal-2 qanotli raketalarini ilk bor 2021-yil sentyabr va 2022-yil yanvar oylarida sinovdan o‘tkazgan edi. Bu vaqtga kelib u yana bir nechta shunday raketalarni uchirdi, ular mos ravishda 1500 kilometr va 2000 kilometr masofani bosib o‘tishga qodir.
Qanotli raketaning uchirilishi BMT Xavfsizlik kengashining Shimoliy Koreyaga ballistik raketa texnologiyasidan foydalanishni taqiqlovchi bir qancha rezolyutsiyalarini buzmaydi. Biroq bu xavfsizlikka jiddiy tahdid solishi mumkin, chunki bunday raketalar yadro kallaklari bilan jihozlanishi mumkin.
Izoh (0)