Германияда тўрт кунлик иш ҳафтасига ўтиш бўйича тажриба бошланди, деб хабар бермоқда Bloomberg. 1 февралдан бошлаб 45 та компания пилот лойиҳага қўшилади. Тажриба олти ой давом этади.
Ушбу компаниялар ходимлари доимгидек миқдорда маош олади, лекин ҳафтада бир кун камроқ ишлайди. Лойиҳанинг асосий мақсади иш ҳафтасини қисқартириш ходимларнинг меҳнат унумдорлигини оширишга олиб келадими ёки йўқлигини аниқлашдан иборат.
Solidsense компанияси асосчиларидан бири ва лойиҳа иштирокчиси Сёрен Фрике бундай инвестициялар ходимларнинг фаровонлигини, мотивациясини ва шу орқали самарадорлигини ошириши мумкинлигига ишонч билдирди.
Таъкидланишича, малакали кадрлар етишмаслиги ва юқори инфляция ишчиларни иш ҳақини оширишни талаб қилишга ва пандемия даврида эришган мослашувчанлик ва мустақилликни сақлаб қолишга мажбур қилмоқда. Германияда яқинда поезд машинистлари иш ҳақини сақлаб қолган ҳолда иш вақтини ҳафтасига 38 соатдан 35 соатга қисқартиришни талаб қилиб, олти кунлик иш ташлаш эълон қилди. Қурилиш касаба уюшмалари иш ҳақини 20 фоиздан ортиқ оширишни талаб қилмоқда. Прогнозларга кўра, 2035 йилга келиб Германия меҳнат бозори туғилишдаги муаммолар ва кексайган аҳоли шароитида иммиграция билан боғлиқ муаммолар туфайли 7 миллиондан ортиқ одамни йўқотиши мумкин.
Жаҳон соғлиқни сақлаш ташкилоти (ЖССТ) ва Халқаро меҳнат ташкилоти (ХМТ) томонидан ўтказилган тадқиқот шуни кўрсатдики, узоқ иш вақти соғлиқ учун жиддий хавф туғдиради, бу инсульт ва юрак касалликларига олиб келади ва ҳар йили юз минглаб одамларнинг ўлимига сабаб бўлади. Хусусан, 2016 йилда 745 минг кишининг инсульт ва юрак-қон томир касалликларидан вафот этишига узоқ иш вақти сабаб бўлган. Бу кўрсаткич 2000 йилга нисбатан 29 фоизга кўп, бу узоқ иш вақтининг соғлиқ учун хавф даражаси ошганини кўрсатади.
Изоҳ (0)