Isroil Birlashgan Millatlar Tashkiloti bosh kotibi Antoniu Guterrish iste’foga chiqishi kerak, deb hisoblaydi. Bu haqda Isroil tashqi ishlar vaziri Israel Kats ma’lum qildi, deb yozadi Politico.
![](/static/2024/01/31/photo_2024-01-31_14-17-20-e38cc-gD.jpg)
Nashrning qayd etishicha, Isroil tomonidan bu bayonot BMTning falastinlik qochqinlarga yordam ko‘rsatish agentligi (UNRWA) xodimlarining 7-oktyabr kungi HAMAS hujumiga aloqadorligi haqidagi ayblovlaridan keyin berilgan.
“Albatta, BMT bosh kotibi sifatida uning zimmasida javobgarlik bor. Guterrish iste’foga chiqishi yoki BMT uni almashtirishi kerak”, — deya ta’kidladi Kats.
Eslatib o‘tamiz, 26-yanvar kuni UNRWA tergov boshlanganini eʼlon qilgandi. BMT bosh kotibi Antoniu Guterrish esa HAMASning Isroilga hujumida muayyan xodimlarning ishtiroki haqidagi maʼlumotlarni ko‘rib chiqish tashabbusi bilan chiqqan.