Oliy Majlis qonunchilik palatasining majlisida deputatlar tomonidan respublikada, shu jumladan, Toshkent shahrida atmosfera havosi ifloslanishining oldini olish borasida amalga oshirilayotgan ishlar yuzasidan Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimovning axboroti eshitilmoqda.
Mazkur masala dastlab Ekologik partiya fraksiyasi hamda Ekologiya va atrof-muhitni muhofaza qilish masalalari qo‘mitasining qo‘shma yig‘ilishida atroflicha muhokama qilindi. Shundan kelib chiqib, atmosfera havosi muhofazasiga oid ko‘rilayotgan choralar bo‘yicha haqiqiy holatni o‘rganish, aholining fikr-mulohazalarini eshitish maqsadida hududlarda ham o‘rganishlar olib borildi.
O‘rganishlar davomida deputatlar tomonidan atmosfera havosiga taʼsir etuvchi omillar chuqur o‘rganilib, uni muhofaza qilishga doir qonun hujjatlaridagi kamchilik va bo‘shliqlarni to‘ldirish, jumladan, atrof-muhitga zararli taʼsir ko‘rsatayotgan korxonalar, tashkilotlar, inshootlar va boshqa obyektlar faoliyatini ekologik baholashning amaldagi tizimini xalqaro xujjatlarga moslashtirish bo‘yicha bir qator takliflar ishlab chiqildi.
Vazirning taʼkidlashicha, mamlakatda atrof-muhitni muhofaza qilish, tabiiy resurslardan oqilona foydalanish, ekologik muammolarni hal etish va ularning salbiy oqibatlarini bartaraf qilish borasida tizimli ishlar qilinmoqda. Xususan, atmosfera havosi ifloslanishining fon monitoringini amalga oshirish maqsadida respublikaning 26 ta tuman (shahar)laridagi 74 ta ko‘chmas kuzatuv punktlarida, shu jumladan, 8 ta avtomatlashtirilgan monitoring stansiyalarida kuzatuvlar yo‘lga qo‘yilgan.
O‘tgan 2023-yilda atmosfera havosiga tashlamalar 2 138,3 ming tonnani tashkil etgan bo‘lsa, ulardan 1 279,9 ming tonnasi yoki 59,9 foizi avtotransport vositalari, 858,4 ming tonnasi yoki 40,1 foizi sanoat korxonalari hissasiga to‘g‘ri kelgan.
Izoh (0)