Raqobatni rivojlantirish va iste’molchilar huquqlarini himoya qilish qo‘mitasi avtolizing firma xizmatlaridan foydalanishda ehtiyotkor bo‘lishga chaqirdi.
Ma’lum qilinishicha, hozirgi vaqtga qadar qo‘mitaga isteʼmolchilardan avtomobillarni lizing va ijaraga beruvchi korxonalar tomonidan shartnomaviy majburiyatlar bajarilmayotgani to‘g‘risida ko‘plab murojaatlar kelib tushgan bo‘lib, ular belgilangan tartibda ko‘rib chiqilgan.
Xususan, o‘tgan yillar davomida avtomobillar uchun oldindan to‘lovlarni amalga oshirgan, biroq belgilangan muddatda avtomobil yetkazib berilmagan yoki to‘langan pullar qaytarib berilmayotgan holati bo‘yicha 2000 ga yaqin murojaatlar kelib tushgan.
Mazkur murojaatlarning asosiy qismi “Umid Avto Companies” MCHJ, “Orient Avto-Lizing” MCHJ va “Imkon Avto” MCHJ, “Mega Auto Lizing” MCHJ, “Avto 60-oy” MCHJ, “Avtohamkor 0 foiz” MCHJ va boshqa korxonalar hissasiga to‘g‘ri keladi.
Mazkur korxonalar isteʼmolchilarning pul mablag‘larini qisqa muddatda yangi avtomobil olib berish vaʼdasi bilan jalb qilib, o‘z majburiyatlarini boshqa isteʼmolchilardan jalb qilingan mablag‘lar evaziga qoplash va isteʼmolchilardan olingan pullarni qaytarishni bir yildan ortiq muddatga kechiktirish (ushlab turish) kabi holatlarga yo‘l qo‘ymoqda.
Yuqoridagi holatlar yuzasidan “Umid auto leasing”, “Umid lizing Tashkent”, “Umid auto”, “Umid avto Tashkent”, “Umid avto lizing”, “Mega Avto Leasin-Hamkor”, “Mega Avto Leasin”, “Samo Rimmax Avto”, “Rimmax Auto Leasin”, “Ishonch Auto Leasin”, “Asr Auto Leasin”, “Baraka Avto Baraka Business” MCHJlar mansabdor shaxslariga nisbatan jinoyat ishlari qo‘zg‘atilgan.
“Biroq bugungi kunda ushbu kabi korxonalar mansabdor shaxslari tomonidan isteʼmolchilarni chalg‘itish yoki ishonchni suiisteʼmol qilish yo‘li bilan pul mablag‘larini jalb qilish kabi huquqbuzarliklarni davom ettirmoqda hamda ular faoliyati ustidan isteʼmolchilardan ko‘plab shikoyat arizalari kelib tushmoqda.
Qolaversa, “Avto 60-oy” va “Avtohamkor 0 foiz” kabi aholining millardlab pullarini o‘zlashtirgan avtolizing firmalar haqida juda ko‘p marta gapirilgan bo‘lsa-da, ayrim fuqarolarimiz hamon bunday firmalar aldoviga ishonmoqda”, — deyiladi xabarda.
Qo‘mita avtolizing firmalar bilan shartnoma tuzish (imzolash) va ularga pul to‘lashdan avval shartnoma shartlari bilan, unda to‘lovlarning talablari va muammoli vaziyatlarda uning qaytarib olish muddati va shartlari bilan yaxshilab tanishib chiqishga, firma ishonchliligini axborot manbaalaridan tekshirishga, har qanday aldov va vaʼdalarga ishonmaslikka chaqirdi.
Izoh (0)