O‘zbekistonda chang zarrachalar bilan bog‘liq xavf haddan tashqari yuqori bo‘lgan hudud ma’lum qilindi

“O‘zgidromet” mamlakatning yetti shahri havosi ifloslanish holati to‘g‘risida ma’lumot berdi. 

7 ta shaharga o‘rnatilgan avtomat statsionar post ma’lumotlariga asoslanib, 15-yanvar holatiga respublikaning 7 ta shahar atmosfera havosi sifati to‘g‘risidagi byulleten taqdim etilgan. Unga ko‘ra, poytaxt, Jizzax, Urganch va Nukusda havo tarkibida mayda dispers zarrachalar miqdori ancha kamaygan. Hatto Urganch, Nukus va Jizzaxda RM-2.5 zarrachasining jahon standarti bo‘yicha ham sutkalik me’yordan past hisoblanadi. Poytaxt havosi uglerod oksidi va oltingugurt dioksidi bo‘yicha boshqa oltita shaharnikidan ko‘ra zararliroqdir.

Termizda mayda chang zarrachalar bilan bog‘liq xavf haddan tashqari yuqori. Hatto RM-10 mayda zarrachalari miqdori SanPiN bo‘yicha xam sutkalik ruxsat etilgan me’yordan 2,5 barobar ortgan.