Олий Мажлис қонунчилик палатасининг мажлисида депутатлар томонидан республикада, шу жумладан, Тошкент шаҳрида атмосфера ҳавоси ифлосланишининг олдини олиш борасида амалга оширилаётган ишлар юзасидан Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимовнинг ахбороти эшитилмоқда.
Мазкур масала дастлаб Экологик партия фракцияси ҳамда Экология ва атроф-муҳитни муҳофаза қилиш масалалари қўмитасининг қўшма йиғилишида атрофлича муҳокама қилинди. Шундан келиб чиқиб, атмосфера ҳавоси муҳофазасига оид кўрилаётган чоралар бўйича ҳақиқий ҳолатни ўрганиш, аҳолининг фикр-мулоҳазаларини эшитиш мақсадида ҳудудларда ҳам ўрганишлар олиб борилди.
Ўрганишлар давомида депутатлар томонидан атмосфера ҳавосига таъсир этувчи омиллар чуқур ўрганилиб, уни муҳофаза қилишга доир қонун ҳужжатларидаги камчилик ва бўшлиқларни тўлдириш, жумладан, атроф-муҳитга зарарли таъсир кўрсатаётган корхоналар, ташкилотлар, иншоотлар ва бошқа объектлар фаолиятини экологик баҳолашнинг амалдаги тизимини халқаро хужжатларга мослаштириш бўйича бир қатор таклифлар ишлаб чиқилди.
Вазирнинг таъкидлашича, мамлакатда атроф-муҳитни муҳофаза қилиш, табиий ресурслардан оқилона фойдаланиш, экологик муаммоларни ҳал этиш ва уларнинг салбий оқибатларини бартараф қилиш борасида тизимли ишлар қилинмоқда. Хусусан, атмосфера ҳавоси ифлосланишининг фон мониторингини амалга ошириш мақсадида республиканинг 26 та туман (шаҳар)ларидаги 74 та кўчмас кузатув пунктларида, шу жумладан, 8 та автоматлаштирилган мониторинг станцияларида кузатувлар йўлга қўйилган.
Ўтган 2023 йилда атмосфера ҳавосига ташламалар 2 138,3 минг тоннани ташкил этган бўлса, улардан 1 279,9 минг тоннаси ёки 59,9 фоизи автотранспорт воситалари, 858,4 минг тоннаси ёки 40,1 фоизи саноат корхоналари ҳиссасига тўғри келган.
Изоҳ (0)