Ички ишлар органлари ходимларини обрўсизлантириш моддаси Сенат қўмиталари томонидан кўриб чиқилмоқда. Бу ҳақда Олий Мажлис Сенати раиси Танзила Норбоева BBC ўзбек хизмати мухбири билан суҳбатда маълум қилди.
Интервью давомида журналист Сенат раисидан ҳуқуқ-тартибот идоралари ходимларини обрўсизлантириш мақсадида тасвирга олиб тарқатиш нормаси ҳақида сўраб, бундай қонуннинг Сенат томонидан тасдиқланиши демократия тамойилларига қарши бўлиб қолмайдими деган саволни берди.
“Бу қонун тўғрисида турли фикрлар бўляпти. Очиқлик сиёсатининг устуворлиги сабаб эса, ҳар бир қонун қабул қилиш жараёни жамоатчилик эътиборига ҳавола қилиняпти ва жамоатчиликнинг фикри алоҳида эътиборга олиняпти. Бу қонун қонунчилик палатасида қабул қилинди. У ерда ҳам турли фикрлар билдирилди. Лекин кўпчилик овоз билан қонун кўриб чиқиш учун Сенатга юборилди. Ҳозирги кунда ҳар бир қўмита томонидан қонун ўрганишга берилган. Ҳозирча фақат биргина қўмитанинг фикри билан танишдик, бошқа қўмиталар ва халқаро тажрибаларга ва олган халқаро мажбуриятларимизга зид бўлиб, бўлмаганини ўрганиб, ўзларининг хулосасини берганидан кейин Сенат кенгаши ўз фикрини билдиради ва мажлисда қарор қабул қилади. Якуний хулосани мен билдира олмайман, чунки қўмиталаримизда кўриб чиқиш жараёни давом этмоқда”, — дейди Танзила Норбоева.
Олий Мажлис Сенатнинг Мудофаа ва хавфсизлик масалалари қўмитасида “Йўл ҳаракати хавфсизлиги тизими такомиллаштирилиши муносабати билан Ўзбекистон Республикасининг Жиноят кодекси, Жиноят-процессуал кодекси ва Ўзбекистон Республикасининг Маъмурий жавобгарлик тўғрисидаги кодексига қўшимча ва ўзгартиришлар киритиш ҳақида”ги қонуни дастлабки тарзда муҳокама қилинди.
Қонуннинг бир қисми — Маъмурий жавобгарлик тўғрисидаги кодекснинг 195-прим 2-моддасида назарда тутилган ҳуқуқбузарлик ва унга белгиланаётган жазо чоралари жамоатчилик эътирозларига сабаб бўлмоқда.
Изоҳ (0)