11-yanvar kuni Senatning rasmiy saytida “Milliy qonunchiligimizda ichki ishlar organlari xodimlarini tasvirga olishga hech qanday taqiq qo‘yilmayapti” nomli material e’lon qilingan bo‘lib, unda qator rivojlangan davlatlar qonunchiligida huquqni muhofaza qiluvchi organ xodimlarini suratga olish taqiqlangani, muayyan choralar belgilangani ko‘rsatib o‘tilgan.
BBС o‘zbek xizmati Senat tarqatgan bu maʼlumotlarni faktchek qildi.
Jumladan, Senat xabarida Buyuk Britaniyada ko‘chalarda yoki binolarida xizmat vazifalarini bajarayotgan huquqni muhofaza qiluvchi organ xodimlarini ularning roziligisiz suratga olishni taqiqlovchi norma mamlakat parlamenti tomonidan 2000-yilda tasdiqlangani aytiladi.
BBС o‘zbek xizmatining ma’lum qilishicha, Buyuk Britaniya politsiyasi faqatgina terrorizm xavfi mavjud bo‘lsagina, terrorchi deya shubha qilingan shaxsdan tasvirga olishni to‘xtatishni so‘rashi mumkin. Shunda ham politsiyada shubha qilish uchun kuchli asos bo‘lishi kerak. Agar keyinchalik u odam terrorchi bo‘lib chiqmasa, unda shubha qilgan va tasvirga olishni to‘xtatgan politsiyachining o‘zi javobgarlikka tortiladi.
Shuningdek, London politsiyasining saytida aholi uchun e’lon qilingan tavsiyada jamoat joylarida bemalol tasvirga olish mumkinligi, politsiya vakillari fuqarolardan tasvirga olishni to‘xtatishga haqli emasligi yozib qo‘yilgan.
Senat saytida e’lon qilingan Fransiya haqidagi maʼlumot ham noto‘g‘ri ekani BBС o‘zbek xizmati tomonidan ta’kidlandi.
“Fransiyada politsiyani tasvirga olishni taqiqlovchi qonun 2021-yilning aprelida haqiqatan ham qabul qilingan, lekin o‘sha yilning o‘zidayoq Fransiya Konstitutsiyaviy sudi ushbu qonunni konstitutsiyaga zid deya topib, uni bekor qilgan”, — deyiladi BBC videolavhasida.
Bundan tashqari, Senatning 11-yanvardagi xabarida “Germaniyada politsiya xodimlarini suratga olish taqiqlangan emas, biroq ushbu fotosuratlar yoki videolarni ijtimoiy tarmoqlar va Internetga joylashtirish taqiqlangan” deyiladi.
BBС o‘zbek xizmatining ma’lum qilishicha, bu jumla chalg‘ituvchi axborotni o‘zida jam etgan.
“Haqiqatan, Germaniyada boshqa shaxslarning tasvirini Internetda tarqatish mumkin emas, ammo bu kasbidan, lavozimidan, kimligidan qatʼi nazar barcha aholi uchun taalluqli qonun. Aynan organ xodimlari uchun alohida hech qanaqa modda yo‘q. Lekin agar politsiya qonun buzayotgan bo‘lsa, unda bu holatni tasvirga olib, tarqatishga ruxsat berilgan, chunki jamoat manfaati shaxsiy huquqlardan ustun qo‘yiladi”, — deyiladi BBC reportajida.
Mazkur holatga munosabat bildirar ekan, taniqli huquqshunos Xushnud Xudoyberdiyev quyidagicha yozadi: “Ana shunaqa gaplar. Xulosa o‘zingizdan. Senatorlar ham xulosa qiladi, degan umiddamiz. Hurmatli senatorlarimizdan yolg‘on asosiga qurilgan qonunni maʼqullamasliklarini so‘rab qolamiz.”
Izoh (0)