АҚШ давлат котибининг Европа ва Евросиё масалалари бўйича ёрдамчиси Жеймс O’Брайен нинг айтишича, 2024 йил охиригача Украина қуроллари янада кучлироқ бўлади ва Украина Қуролли кучлари жанговар ҳудудларда янада қулайроқ позицияларни эгаллайди. У Украина армияси 2024 йилда ҳужумга ўтиши мумкинлигини тахмин қилди, деб хабар беради “Америка овози”.
O’Брайен нинг сўзларига кўра, жорий йил учун жанговар стратегия “2023 йилда амалга оширилган ишлар”га асосланган. Унинг сўзларига кўра, Украинанинг асосий мақсадлари “Қора денгизга чиқиш ва Россиянинг Қримдаги имкониятларини беқарорлаштириш” бўлади.
Давлат котиби ёрдамчисининг қўшимча қилишича, АҚШ расмийлари агар мамлакат Конгресси Украинага ҳарбий ёрдам пакети ажратишни маъқулламаса, вазиятдан чиқиш учун муқобил вариантлар кўриб чиқмоқда. O’Брайен бу ҳақида батафсилроқ гапиришдан бош тортди.
Декабрь ойи охирида Украина президенти Владимир Зеленский мамлакат 2024 йилда ҳарбий ишлаб чиқаришни кўпайтиришни режалаштираётганини маълум қилганди. Январь ойида Bloomberg Вашингтон Киевдан аниқроқ ҳарбий ҳаракатлар режасини кўрмоқчи эканлигини ёзган эди. АҚШ расмийларига бу “ўз ҳаракатларини яхшироқ мувофиқлаштириш” учун керак экани таъкидланган.
27 декабрь куни Қўшма Штатлар 2023 йилда Украинага 250 миллион доллар миқдоридаги сўнгги ҳарбий ёрдам пакети ўтказилишини эълон қилганди.
Изоҳ (0)