Surxondaryolik bloger Otabek Sattoriyning apellyatsiya sudi 29-iyun kuni soat 10:00 da jinoyat ishlari bo‘yicha Samarqand viloyati sudi tomonidan ko‘riladi.
Eslatib o‘tamiz, Jinoyat ishlari bo‘yicha Muzrabod sudida 4-may kuni bo‘lib o‘tgan sud majlisida prokuror uni 11 yilga ozodlikdan mahrum etishni so‘ragandi. 10-may kuni o‘tkazilgan sud majlisida Sattoriyga 6 yil 6 oy muddatga ozodlikdan mahrum qilish jazosi tayinlandi.
Bloger Otabek Sattoriy Jinoyat kodeksining 139-moddasi 3-qismi “a”, “g” bandlari (og‘ir yoki o‘ta og‘ir jinoyat sodir etishda ayblab, g‘arazgo‘ylik yoki boshqa past niyatlarda tuhmat qilish) va 165-moddasi 3-qismi “a” bandi (juda ko‘p miqdordagi tovlamachilik)da nazarda tutilgan jinoyatlarni sodir etganlikda aybdor deb topilgan.
Uning advokatining apellyatsiya ishini Surxondaryo viloyatidan boshqa viloyatga o‘tkazish bo‘yicha iltimosnomasiga asosan apellyatsiya shikoyati Samarqand viloyat sudi jinoyat ishlari bo‘yicha sudlov hay’atida ko‘riladi.
