Surxondaryo viloyati hokimi To‘ra Bobolov tovlamachilik bilan ayblanib, hozirda hibsxonada saqlanayotgan bloger Otabek Sattoriy borasidagi fikrlari bilan bo‘lishdi, deb xabar beradi “Effect.uz” nashri.
Otabek Sattoriy haqida gapiradigan bo‘lsam, u oxirgi ikki yil ichida ijtimoiy tarmoqlar orqali paydo bo‘ldi. U bolani yaxshi tanimas edim. Bir kuni menga “Rus tilini bilasizmi? Ketmon, o‘roq ushlaganmisiz?” deb savol berdi. To‘g‘risi, men ketmon ushlab yurganimda u hali tug‘ilmagandi. Rus tiliga keladigan bo‘lsak, xohlagan rus bilan bemalol gaplasha olaman.Qolgan so‘zlariga e’tibor bermadim. Otabek muammolarni olib chiqdi, chiqmadi emas. O‘zim ham u ko‘targan muammolar yechimini topishga intildim. U aytgan mahallalarga bordim. Hatto rahmat ham aytdim. Oxirgi vaqtlar sha’nimga tegadigan so‘zlar bilan murojaatlar yo‘llashni boshlagandi.
Men unga “o‘ylab gapirgin, viloyat hokimiman sal hurmat saqlagin” deb aytdim. Oxiri shu bola bilan tenglashib o‘tirmay dedim. Haddidan oshsa ham indamadim. Otabekni yomon demagan bo‘lardim. U ham fuqarolar uchun ishlagan. Ozmi, ko‘pmi muammolarni bizga ko‘rsatib bergan. Ammo biroz shoshqaloqligi, o‘ylamay ish tutishi unga pand berdi.
Otabekning ba’zi savollaridan jahlim chiqqan bo‘lishi mumkin. Biroq uning hozirgi holatini dushmanimga ham ravo ko‘rmayman. U ham oilali, farzandlari bor. Qolaversa, ota-onasiga juda og‘ir. Balki, ehtirosga berilgandir, hali yosh. Agar huquqni muhofaza qiluvchi organlar uning jazosini yengillashtira olsa, yordam berishsa, yaxshi bo‘lardi.
To‘ra Bobolov, Surxondaryo viloyati hokimi
Eslatib o‘tamiz, surxondaryolik bloger Otabek Sattoriy tovlamachilikda ayblanib, 29-yanvar kuni hibsga olingan edi. Deputat Rasul Kusherbayev blogerning qo‘lga olinishiga o‘z munosabatini bildirib, bu holatni “amaldorlarni tanqid qilayotgan bitta blogerga emas, butun boshli so‘z erkinligiga, Prezidentning ochiqlik siyosatiga qarshi surxondaryolik amaldorlarning isyonidir” deb ta’riflagandi.
Blogerning hibsga olinishi yuzasidan Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov ham munosabat bildirdi.
“Qonunni buzishga na jurnalist va na bloger haqli. Men bu haqda kecha o‘z fikrimni bildirdim. Lekin nima uchun eng xavfli jinoyatchidek uning uyida tintuv o‘tkazildi, nima uchun u ko‘plab odamlar bilan olib ketildi, nima uchun sud yopiq bo‘lyapti?
Barcha tovlamachilikda gumon qilingan fuqarolarga shunaqa munosabat qilinadimi? Yoki bloger bo‘lgani uchun shunday alohida ‘hurmat-ehtirommi’? Bu normal holatmi? Ichki ishlar vazirligi bu masala yuzasidan izoh berishi shart. Metodlar qachon o‘zgaradi? Bosib olib ketmay, idoraga qonuniy chaqiruv qog‘ozi bilan chaqirilsa, kelmas edimi? Ehtiyot chorasi sifatida nima uchun eng og‘iri, qamoq tanlandi?
Qonun hamma uchun barobar ekan, organ xodimlari ham oshirib yuborishmasin. Bizning jamoat fondimiz bunday xatti-harakatni keskin qoralaydi. Bosh prokuraturadan ushbu holatga huquqiy baho berishlarini so‘raymiz”, — degan u.
Keyinroq Oliy sud ushbu blogerga qo‘yilgan ayblov o‘zgartirilmagani va prokuraturaning blogerga nisbatan qamoqqa olish ehtiyot chorasi ko‘rilishi haqidagi iltimosnomasi qanoatlantirilgani ma’lum bo‘lgandi. Blogerning advokati Shavkat Shokirov “Gazeta.uz”ga bergan intervyusida u ishni uyushtirilgan deb hisoblashini aytgan.
“Agar tergov organi prokuratura bilan birgalikda o‘z yuzini yo‘qotishni istamasa, unda jinoyat alomatlari yo‘qligi to‘g‘risida bayonot bilan uni ozod qilishi kerak. Hozirda ular boshqa bir qonunbuzarlik faktini ‘yaratish’ bilan band deb qo‘rqaman… Hozir Otabek butun tizim unga qarshi ishlayapti, deb hisoblamoqda”, — degan advokat.
11-fevral kuni Bosh prokuratura bloger Sattoriyning xatti-harakatlari yuzasidan 7 ta holat bo‘yicha murojaatlar kelib tushganini ma’lum qilgandi.
Izoh (0)