Yanvar boshida Amerikada “Emmi—2023” mukofotlarini topshirish marosimi bo‘lib o‘tdi va qaysi serial yaxshilarning eng yaxshisi bo‘lish sharafiga sazovor bo‘lganini bilib oldik. Ammo Turkiyaning ba’zi loyihalari ham g‘alaba uchun da’vogarlar ro‘yxatida bo‘lganini bilasizmi?
“Eng yaxshi telenovella” yo‘nalishida “Emmi” nominatsiyasi
“Sevgi iztirobi” (2015-2017)
Bosh rollarni Burak O‘zchivit, Neslihan Atagul va Kaan Urganjio‘g‘li o‘ynagan “Sevgi iztirobi” seriali Turkiya uchun chinakam shov-shuvli va daromadli loyihaga aylandi. Kamol va Nihonning sevgi hikoyasi ikki yil davomida tomoshabinlarni televizor qarshisiga mixlab qo‘ydi. Albatta, “Sevgi iztirobi” seriali Turkiyada juda ko‘p mukofotlarga sazovor bo‘lgan, ammo butun jamoa uchun eng muhim yutuq xalqaro “Emmi” mukofoti bo‘ldi.
2017-yil 20-noyabr kuni “Sevgi iztirobi” “Yilning eng yaxshi telenovellasi” nominatsiyasida g‘olib chiqqani ma’lum qilindi. Aytgancha, ushbu loyiha xalqaro mukofotga sazovor bo‘lgan birinchi loyiha bo‘ldi. Nyu-Yorkdagi taqdirlash marosimiga Ay Yapim rahbari Kerem Chatay, loyiha rejissori Hilol Saral va serial ssenariy muallifi Burju Go‘rgun Toptash keldi. Ammo Burak O‘zchivit va Neslihan Atagul tadbirda bo‘lmagan. Ma’lumki, o‘sha paytda yulduzlar o‘rtasidagi munosabatlar yomonlashgandi. Aynan shuning uchun ular “Emmi” marosimiga kelmaslikka qaror qilgan bo‘lishi mumkin.
“Pul va gul ishqi” (2014-2015)
Engin Akyurek va Tuba Buyukustun ishtirok etgan loyiha xalqaro “Emmi” mukofotiga nomzod bo‘ldi, lekin g‘olib chiqa olmadi. Aytgancha, ushbu loyihadan umumiy tendensiyani aniqlash mumkin: detektivlar deyarli har doim nufuzli mukofotga nomzod bo‘ladi.
Serial bosh qahramoni Omer politsiya komissari. U chaqiriqqa binoan voqea sodir bo‘lgan joyga boradi. Ammo ko‘rganlariga ishonmaydi: yo‘lovchi o‘rindig‘ida qallig‘i Sibel, yonida esa unga mutlaqo notanish erkak avtohalokatga uchragan. Albatta, Omer baxtsiz hodisa tasodif ekanligiga ishonmaydi, shuning uchun o‘zi tergov boshlaydi, bu esa kutilmagan natijalarga olib keladi.
“Istanbullik kelin” (2017-2019)
“Istanbullik kelin” oddiy romantik teleserial bo‘lib tuyulsa-da, lekin hammasi bir qarashda oddiy emas. O‘zjan Deniz va Asli Enver ishtirok etgan serialning muvaffaqiyat kaliti albatta yulduzli jamoa bo‘lgan. Ular haykalchaga erisholmadi, lekin butun dunyo “Istanbullik kelin” haqida gapira boshladi.
Shunisi e’tiborga loyiqki, serial sujeti xuddi “Qo‘rg‘on sirlari”dagi kabi amaliyotchi psixolog Gulseren Budaychio‘g‘lining qaydlariga asoslanadi. Aynan shu fakt loyihani “jonli” qiladi. Bir qarashda serial voqealari juda oddiy. Faruk bursalik boy va nufuzli oilaning merosxo‘ri, Sureyya esa Istanbulda xolasi bilan yashaydigan oddiy oilaning qizi. Ular uchrashishi va, albatta, bir-birlarini sevib qolishlari kerak. Ammo ularning hikoyasini baxtli deb atash mumkinmi?
“Jasur va go‘zal” (2016-2017)
2018-yilda “Emmi” mukofotiga nomzod bo‘lgan ikkinchi turk seriali esa orzu qilingan haykalchasiz qoldi. Bosh rollarda Kivanch Tatlitug‘ va Tuba Buyukustun. Bu serial, albatta, detektiv yoki jangovar film emas, balki Romeo va Julettaning zamonaviy variantidir. Serial bosh qahramoni Jasur katta shahardan kichik bir qishloqqa keladi. U yerda u go‘zalligi afsonalarga aylangan Subhan ismli qizni uchratadi.
Subhan biznes bilan shug‘ullanuvchi badavlat oilaning qizi. Har doimgidek yoshlar o‘rtasida muhabbat paydo bo‘ladi. Biroq ularning oilalari ko‘p yillar davomida janjallashib kelganini bilishmaydi va otalari bu vaqt davomida o‘zlarining “qorong‘i tomonlarini” begona ko‘zlardan yashirgan. Muammoli vaziyatni bilish Subhan va Jasur uchun juda og‘riqli bo‘ladi. Qolaversa, ular ota-onalariga qarshilik ko‘rsata oladimi va sevgisini saqlab qoladimi, noma’lum
“Eng yaxshi aktyor/aktrisa” yo‘nalishida “Emmi” nominatsiyasi
Tolga Saritash (“Va’da”)
“Muhtasham yuz yil” serialidagi roli bilan tomoshabinlarga tanilgan Tolga ham 2018-yilda eng yaxshi aktyor sifatida “Emmi” mukofotiga nomzod bo‘lgan. Xalqaro hamjamiyat uning Yavuz rolini o‘ynagan “Va’da” serialidagi aktyorlik mahoratini yuqori baholadi. Loyiha vatanga muhabbat va vatanparvarlik mavzusini ochib beradi — filmda vatanini qutqarishi kerak bo‘lgan maxsus bo‘linma haqida hikoya qilinadi.
Tuba Buyukustun (“20 daqiqa”)
2014-yilda turkiyalik aktrisa Tuba Buyukustun “20 daqiqa” serialidagi Melek roli uchun “Emmi” mukofotiga nomzod bo‘lgan edi. U “Eng yaxshi aktrisa” nominatsiyasida mukofot ololmagan bo‘lsa-da, xalqaro jamoatchilik e’tiborini o‘ziga qaratishga muvaffaq bo‘ldi. Qizig‘i shundaki, Tuba aktrisalikka o‘qimagan: u liboslar va sahna dizayneri. Biroq uning deyarli barcha rollari milliy va xalqaro nufuzli mukofotlarga sazovor bo‘lgan.
Haluk Bilginer (“Shaxsiyat”)
Aktyor Haluk Bilginerni Turkiyadagi eng ko‘zga ko‘ringan aktyorlardan biri deb atash mumkin. Aktyor ko‘pincha xorijiy film va seriallarda rol o‘ynagan va “Ist-End aholisi” teleserialidagi Mehmet Usmon roli bilan mashhur bo‘lgan. Uning mahoratini tasdiqlovchi yana bir muhim dalil — aktyor Anjelina Joli bilan birga “Meriya” filmida rol o‘ynaydi.
2019-yilda Haluk “Shaxsiyat” turk serialidagi manyak roli uchun “Eng yaxshi aktyor” nominatsiyasida Emmi mukofotiga sazovor bo‘ldi. Netflix platformasida chiqqan loyiha internetda keng muhokama qilindi.
Bosh qahramon Alsgeymer kasalligi bilan og‘rigan nafaqaxo‘r bo‘lib, u ilgari sudda kichik kotib bo‘lib ishlagan. Ruhiyatidagi o‘zgarishlar tufayli u korrupsiya, mansab vakolatini suiiste’mol qilish va boshqa huquqbuzarliklar bilan qo‘lga tushgan har bir shaxsni qidirib topadi va o‘zi jazolaydi.
Izoh (0)