Январь бошида Америкада “Эмми—2023” мукофотларини топшириш маросими бўлиб ўтди ва қайси сериал яхшиларнинг энг яхшиси бўлиш шарафига сазовор бўлганини билиб олдик. Аммо Туркиянинг баъзи лойиҳалари ҳам ғалаба учун даъвогарлар рўйхатида бўлганини биласизми?
“Энг яхши теленовелла” йўналишида “Эмми” номинацияси
“Севги изтироби” (2015-2017)
Бош ролларни Бурак Ўзчивит, Неслиҳан Атагул ва Каан Урганжиўғли ўйнаган “Севги изтироби” сериали Туркия учун чинакам шов-шувли ва даромадли лойиҳага айланди. Камол ва Ниҳоннинг севги ҳикояси икки йил давомида томошабинларни телевизор қаршисига михлаб қўйди. Албатта, “Севги изтироби” сериали Туркияда жуда кўп мукофотларга сазовор бўлган, аммо бутун жамоа учун энг муҳим ютуқ халқаро “Эмми” мукофоти бўлди.
2017 йил 20 ноябрь куни “Севги изтироби” “Йилнинг энг яхши теленовелласи” номинациясида ғолиб чиққани маълум қилинди. Айтганча, ушбу лойиҳа халқаро мукофотга сазовор бўлган биринчи лойиҳа бўлди. Нью-Йоркдаги тақдирлаш маросимига Ай Япим раҳбари Керем Чатай, лойиҳа режиссёри Ҳилол Сарал ва сериал сценарий муаллифи Буржу Гўргун Топташ келди. Аммо Бурак Ўзчивит ва Неслиҳан Атагул тадбирда бўлмаган. Маълумки, ўша пайтда юлдузлар ўртасидаги муносабатлар ёмонлашганди. Айнан шунинг учун улар “Эмми” маросимига келмасликка қарор қилган бўлиши мумкин.
“Пул ва гул ишқи” (2014-2015)
Энгин Акюрек ва Туба Буюкустун иштирок этган лойиҳа халқаро “Эмми” мукофотига номзод бўлди, лекин ғолиб чиқа олмади. Айтганча, ушбу лойиҳадан умумий тенденцияни аниқлаш мумкин: детективлар деярли ҳар доим нуфузли мукофотга номзод бўлади.
Сериал бош қаҳрамони Омер полиция комиссари. У чақириққа биноан воқеа содир бўлган жойга боради. Аммо кўрганларига ишонмайди: йўловчи ўриндиғида қаллиғи Сибел, ёнида эса унга мутлақо нотаниш эркак автоҳалокатга учраган. Албатта, Омер бахтсиз ҳодиса тасодиф эканлигига ишонмайди, шунинг учун ўзи тергов бошлайди, бу эса кутилмаган натижаларга олиб келади.
“Истанбуллик келин” (2017-2019)
“Истанбуллик келин” оддий романтик телесериал бўлиб туюлса-да, лекин ҳаммаси бир қарашда оддий эмас. Ўзжан Дениз ва Асли Энвер иштирок этган сериалнинг муваффақият калити албатта юлдузли жамоа бўлган. Улар ҳайкалчага эришолмади, лекин бутун дунё “Истанбуллик келин” ҳақида гапира бошлади.
Шуниси эътиборга лойиқки, сериал сюжети худди “Қўрғон сирлари”даги каби амалиётчи психолог Гулсерен Будайчиўғлининг қайдларига асосланади. Айнан шу факт лойиҳани “жонли” қилади. Бир қарашда сериал воқеалари жуда оддий. Фарук бурсалик бой ва нуфузли оиланинг меросхўри, Сурейя эса Истанбулда холаси билан яшайдиган оддий оиланинг қизи. Улар учрашиши ва, албатта, бир-бирларини севиб қолишлари керак. Аммо уларнинг ҳикоясини бахтли деб аташ мумкинми?
“Жасур ва гўзал” (2016-2017)
2018 йилда “Эмми” мукофотига номзод бўлган иккинчи турк сериали эса орзу қилинган ҳайкалчасиз қолди. Бош ролларда Киванч Татлитуғ ва Туба Буюкустун. Бу сериал, албатта, детектив ёки жанговар фильм эмас, балки Ромео ва Жульеттанинг замонавий вариантидир. Сериал бош қаҳрамони Жасур катта шаҳардан кичик бир қишлоққа келади. У ерда у гўзаллиги афсоналарга айланган Субҳан исмли қизни учратади.
Субҳан бизнес билан шуғулланувчи бадавлат оиланинг қизи. Ҳар доимгидек ёшлар ўртасида муҳаббат пайдо бўлади. Бироқ уларнинг оилалари кўп йиллар давомида жанжаллашиб келганини билишмайди ва оталари бу вақт давомида ўзларининг “қоронғи томонларини” бегона кўзлардан яширган. Муаммоли вазиятни билиш Субҳан ва Жасур учун жуда оғриқли бўлади. Қолаверса, улар ота-оналарига қаршилик кўрсата оладими ва севгисини сақлаб қоладими, номаълум
“Энг яхши актёр/актриса” йўналишида “Эмми” номинацияси
Толга Сариташ (“Ваъда”)
“Муҳташам юз йил” сериалидаги роли билан томошабинларга танилган Толга ҳам 2018 йилда энг яхши актёр сифатида “Эмми” мукофотига номзод бўлган. Халқаро ҳамжамият унинг Явуз ролини ўйнаган “Ваъда” сериалидаги актёрлик маҳоратини юқори баҳолади. Лойиҳа ватанга муҳаббат ва ватанпарварлик мавзусини очиб беради — фильмда ватанини қутқариши керак бўлган махсус бўлинма ҳақида ҳикоя қилинади.
Туба Буюкустун (“20 дақиқа”)
2014 йилда туркиялик актриса Туба Буюкустун “20 дақиқа” сериалидаги Мелек роли учун “Эмми” мукофотига номзод бўлган эди. У “Энг яхши актриса” номинациясида мукофот ололмаган бўлса-да, халқаро жамоатчилик эътиборини ўзига қаратишга муваффақ бўлди. Қизиғи шундаки, Туба актрисаликка ўқимаган: у либослар ва саҳна дизайнери. Бироқ унинг деярли барча роллари миллий ва халқаро нуфузли мукофотларга сазовор бўлган.
Ҳалук Билгинер (“Шахсият”)
Актёр Ҳалук Билгинерни Туркиядаги энг кўзга кўринган актёрлардан бири деб аташ мумкин. Актёр кўпинча хорижий фильм ва сериалларда роль ўйнаган ва “Ист-Энд аҳолиси” телесериалидаги Меҳмет Усмон роли билан машҳур бўлган. Унинг маҳоратини тасдиқловчи яна бир муҳим далил — актёр Анжелина Жоли билан бирга “Мерия” фильмида роль ўйнайди.
2019 йилда Ҳалук “Шахсият” турк сериалидаги маняк роли учун “Энг яхши актёр” номинациясида Эмми мукофотига сазовор бўлди. Netflix платформасида чиққан лойиҳа интернетда кенг муҳокама қилинди.
Бош қаҳрамон Альцгеймер касаллиги билан оғриган нафақахўр бўлиб, у илгари судда кичик котиб бўлиб ишлаган. Руҳиятидаги ўзгаришлар туфайли у коррупция, мансаб ваколатини суиистеъмол қилиш ва бошқа ҳуқуқбузарликлар билан қўлга тушган ҳар бир шахсни қидириб топади ва ўзи жазолайди.
Изоҳ (0)