Toshkentning Uchtepa tumanida bir oilaning besh nafar a’zosi xonadondan hushsiz holda topildi, deb xabar bermoqda “Gazeta.uz”. Bosh prokuratura matbuot kotibi Hayot Shamsutdinov “Daryo”ga bu ma’lumotni tasdiqladi.
Ma’lum bo‘lishicha, 16-yanvar kuni soat 17:00 atrofida tuman ichki ishlar organlariga 1-Tong ko‘chasida yashovchi besh nafar fuqaro hushsiz holda topilgani yuzasidan xabar kelib tushgan.
Voqea joyi va murdalar tezkor-tergov guruhi tomonidan ko‘zdan kechirilganda 36 yoshli ayol M.N. va uning 3 yoshli qizi S.S. vafot etgani ma’lum bo‘lgan. Shuningdek, Respublika shoshilinch tez tibbiy yordam ilmiy markazining toksikologiya bo‘limiga og‘ir ahvolda olib borilgan 39 yoshli erkak Z.A. ham ko‘rsatilgan tez-tibbiy yordamga qaramasdan, bir kun o‘tib vafot etgan.
Bundan tashqari, 12 yoshli qiz M.S. va hali yoshga to‘lmagan qiz F.S. hushsiz holatda topilib, RSHTYIMning toksikologiya jonlantirish bo‘limiga joylashtirilgan.
Hodisa joyidan turli xil giyoh va dori vositalari, xonadonda iste’mol qilingan oziq-ovqat mahsulotlarining barchasi ashyoviy dalil sifatida olingan.
“Hozircha o‘limga nima sabab bo‘lganini aniq ayta olmaymiz. Ayni paytda ekspertiza tayinlangan, aniq xulosadan keyin oila a’zolari qanday vafot etgani ma’lum bo‘ladi”, — dedi Hayot Shamsutdinov.
Holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) 4-qismi “a” bandi bilan jinoyat ishi qo‘zg‘atilgan, dastlabki tergov harakatlari olib borilmoqda.
Izoh (0)