Тошкентнинг Учтепа туманида бир оиланинг беш нафар аъзоси хонадондан ҳушсиз ҳолда топилди, деб хабар бермоқда “Газета.уз”. Бош прокуратура матбуот котиби Ҳаёт Шамсутдинов “Дарё”га бу маълумотни тасдиқлади.
Маълум бўлишича, 16 январь куни соат 17:00 атрофида туман ички ишлар органларига 1-Тонг кўчасида яшовчи беш нафар фуқаро ҳушсиз ҳолда топилгани юзасидан хабар келиб тушган.
Воқеа жойи ва мурдалар тезкор-тергов гуруҳи томонидан кўздан кечирилганда 36 ёшли аёл М.Н. ва унинг 3 ёшли қизи С.С. вафот этгани маълум бўлган. Шунингдек, Республика шошилинч тез тиббий ёрдам илмий марказининг токсикология бўлимига оғир аҳволда олиб борилган 39 ёшли эркак З.А. ҳам кўрсатилган тез-тиббий ёрдамга қарамасдан, бир кун ўтиб вафот этган.
Бундан ташқари, 12 ёшли қиз М.С. ва ҳали ёшга тўлмаган қиз Ф.С. ҳушсиз ҳолатда топилиб, РШТЁИМнинг токсикология жонлантириш бўлимига жойлаштирилган.
Ҳодиса жойидан турли хил гиёҳ ва дори воситалари, хонадонда истеъмол қилинган озиқ-овқат маҳсулотларининг барчаси ашёвий далил сифатида олинган.
“Ҳозирча ўлимга нима сабаб бўлганини аниқ айта олмаймиз. Айни пайтда экспертиза тайинланган, аниқ хулосадан кейин оила аъзолари қандай вафот этгани маълум бўлади”, — деди Ҳаёт Шамсутдинов.
Ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) 4-қисми “а” банди билан жиноят иши қўзғатилган, дастлабки тергов ҳаракатлари олиб борилмоқда.
Изоҳ (0)