Rossiyaning “yaqin doirasiga” kiruvchi 5 ta davlat ma’lum qilindi

Rossiya tashqi ishlar vaziri Sergey Lavrov, mamlakatning “yaqin doirasi”ga kiruvchi davlatlarni sanadi. Bu haqda “RBK” xabar berdi.

Sergey Lavrov 2023-yildagi Rossiya diplomatiyasi yakunlariga bag‘ishlangan matbuot anjumanida bu bo‘yicha gapirdi.

“Agar biz yaqin doiramiz haqida gapiradigan bo‘lsak, albatta, bular Yaqin Sharq mamlakatlari — Eron, Turkiya, Saudiya Arabistoni, Birlashgan Arab Amirliklari va Qatardir”, — dedi Lavrov.

Bundan tashqari, u Rossiyaning Xitoy bilan munosabatlariga alohida to‘xtalib, ular o‘zining ko‘p asrlik tarixidagi eng yaxshi davrni boshdan kechirayotganini aytdi. Hindistonni tilga olgan Lavrovning so‘zlariga ko‘ra, ikki davlat o‘rtasida strategik hamkorlik rivojlanmoqda. 

Lavrovning so‘zlariga ko‘ra, 500 yil davomida G‘arb “gegemon” roliga o‘rganib qolgan va boshqa “mamlakatlar manfaatlarini” hisobga olmaydi, ayni paytda Moskva teng sharoitlarda hamkorlik qilishga tayyor bo‘lgan hamkorlar bilan munosabatlarni rivojlantirmoqda.

“Biz teng huquqli, o‘zaro manfaatli va o‘zaro hurmat asosida buni qilishga tayyor bo‘lganlar bilan munosabatlarni rivojlantirish bo‘yicha juda aniq belgilangan yo‘nalishlarga egamiz”, — dedi diplomat.

U Rossiya nafaqat ikki tomonlama munosabatlar, balki “mintaqaviy tuzilmalar” — Fors ko‘rfazi hamkorlik kengashi, Arab davlatlari ligasi, ASEAN, Afrika ittifoqi, Lotin Amerikasi va Karib havzasi mamlakatlari hamjamiyati va boshqalar bilan hamkorlikni ham rivojlantirishini aytdi.

Eslatib o‘tamiz, 2023-yilning fevral oyida Rossiya TIV rahbari “Ukraina yo‘lidan borishi mumkin bo‘lgan” navbatdagi davlat Moldova ekanini, chunki davlat rahbari Mayya Sandu NATOga aʼzo bo‘lishga intilayotganini aytgandi. 

Bungacha Lavrov Ukraina prezidenti Vladimir Zelenskiy bilan hech qanday muzokaralar haqida gap bo‘lishi mumkin emasligini aytgan. U Moskva har qanday jiddiy takliflarga javob berishga tayyorligini, biroq hozircha bundaylarni ko‘rmaganini ta’kidlagan.