Россиянинг “яқин доирасига” кирувчи 5 та давлат маълум қилинди

Россия ташқи ишлар вазири Сергей Лавров, мамлакатнинг “яқин доираси”га кирувчи давлатларни санади. Бу ҳақда “РБК” хабар берди.

Сергей Лавров 2023 йилдаги Россия дипломатияси якунларига бағишланган матбуот анжуманида бу бўйича гапирди.

“Агар биз яқин доирамиз ҳақида гапирадиган бўлсак, албатта, булар Яқин Шарқ мамлакатлари — Эрон, Туркия, Саудия Арабистони, Бирлашган Араб Амирликлари ва Қатардир”, — деди Лавров.

Бундан ташқари, у Россиянинг Хитой билан муносабатларига алоҳида тўхталиб, улар ўзининг кўп асрлик тарихидаги энг яхши даврни бошдан кечираётганини айтди. Ҳиндистонни тилга олган Лавровнинг сўзларига кўра, икки давлат ўртасида стратегик ҳамкорлик ривожланмоқда. 

Лавровнинг сўзларига кўра, 500 йил давомида Ғарб “гегемон” ролига ўрганиб қолган ва бошқа “мамлакатлар манфаатларини” ҳисобга олмайди, айни пайтда Москва тенг шароитларда ҳамкорлик қилишга тайёр бўлган ҳамкорлар билан муносабатларни ривожлантирмоқда.

“Биз тенг ҳуқуқли, ўзаро манфаатли ва ўзаро ҳурмат асосида буни қилишга тайёр бўлганлар билан муносабатларни ривожлантириш бўйича жуда аниқ белгиланган йўналишларга эгамиз”, — деди дипломат.

У Россия нафақат икки томонлама муносабатлар, балки “минтақавий тузилмалар” — Форс кўрфази ҳамкорлик кенгаши, Араб давлатлари лигаси, ASEAN, Африка иттифоқи, Лотин Америкаси ва Кариб ҳавзаси мамлакатлари ҳамжамияти ва бошқалар билан ҳамкорликни ҳам ривожлантиришини айтди.

Эслатиб ўтамиз, 2023 йилнинг февраль ойида Россия ТИВ раҳбари “Украина йўлидан бориши мумкин бўлган” навбатдаги давлат Молдова эканини, чунки давлат раҳбари Майя Санду НАТОга аъзо бўлишга интилаётганини айтганди. 

Бунгача Лавров Украина президенти Владимир Зеленский билан ҳеч қандай музокаралар ҳақида гап бўлиши мумкин эмаслигини айтган. У Москва ҳар қандай жиддий таклифларга жавоб беришга тайёрлигини, бироқ ҳозирча бундайларни кўрмаганини таъкидлаган.