Rossiya tashqi ishlar vaziri Sergey Lavrov AQSH bilan muloqotni tiklash shartini ma’lum qildi. Siyosatchi “TASS” agentligiga bergan intervyusida bu haqda gapirdi.
Lavrovga ko‘ra, Rossiya bilan muloqotni tiklash uchun AQSH davlatlararo munosabatlarning sivilizatsiyalashgan tamoyillariga qaytishi kerak, ammo hozircha bunday belgilar yo‘q.
“Ular davlatlararo munosabatlarni amalga oshirishning sivilizasiyalashgan tamoyillariga, jumladan strategik hujum qurollari shartnomasida (Rossiya va AQSH o‘rtasida strategik yadro qurollari arsenallarini o‘zaro qisqartirish bo‘yicha ikki tomonlama kelishuv) mustahkamlangan tamoyillarga qaytishi kerak. Hozircha biz AQSH xalqaro huquqiy hujjatlarda, birinchi navbatda, BMT nizomida mustahkamlangan dastlabki boshlang‘ich nuqtaga qaytishga tayyorligini ko‘rmayapmiz”, — dedi diplomat.
Sergey Lavrov BMT nizomida davlatlarning suveren tengligi hurmat qilinishi zarurligi ta’kidlaganini aytdi.
“Ularning harakatlari ushbu tamoyillarga bevosita ziddir. AQSH Rossiyaga qarshi gibrid urush e’lon qildi va bu keng qamrovlidir”, — deydi diplomat va qachondir “qarama-qarshilik emas, muloqot g‘alaba qozonishiga” umid bildirdi.
Izoh (0)