Lavrov Rossiyaning asosiy vazifasi G‘arbga qaramlikdan qutulish ekanini aytdi

Tashqi ishlar vaziri Sergey Lavrov Rossiyaning 2024-yilga mo‘ljallangan asosiy vazifasi G‘arb davlatlariga qaramlikdan qutulish deb hisoblaydi.

Uning ta’kidlashicha, hukumat allaqachon “AQSH va ittifoqdoshlarining tajovuzkor, noqonuniy siyosati tufayli shakllangan” sharoitlarda Rossiya iqtisodiyotini rivojlantirish choralarini belgilab qo‘ygan.

“Vazifalar aniq — u yoki bu tarzda boshqariladigan yoki g‘arblik hamkasblarimizning katta ta’siri ostida bo‘lgan ishlab chiqarish va sotish, moliyaviy, bank, logistika zanjirlariga qaramlikdan xalos bo‘lish”, — dedi Sergey Lavrov Rossiya diplomatiyasining 2023-yildagi faoliyati yakunlari bo‘yicha matbuot anjumanida.

Vazirning taʼkidlashicha, hozirdanoq mutasaddi tashkilotlar belgilangan vazifalar ijrosi yuzasidan faol ish olib bormoqda.

Rossiya rasmiylari mamlakat Ukrainadagi janglar tufayli kiritilgan sanksiyalar oqibatlarini yengib chiqqanini bir necha bor taʼkidlagan. Vladimir Putinning so‘zlariga ko‘ra, Rossiya “har tomondan bosim ostida va bo‘g‘ilgan” bo‘lishiga qaramay, Yevropadagi birinchi iqtisodiyotga aylanishga muvaffaq bo‘ldi.