Ташқи ишлар вазири Сергей Лавров Россиянинг 2024 йилга мўлжалланган асосий вазифаси Ғарб давлатларига қарамликдан қутулиш деб ҳисоблайди.
Унинг таъкидлашича, ҳукумат аллақачон “АҚШ ва иттифоқдошларининг тажовузкор, ноқонуний сиёсати туфайли шаклланган” шароитларда Россия иқтисодиётини ривожлантириш чораларини белгилаб қўйган.
“Вазифалар аниқ — у ёки бу тарзда бошқариладиган ёки ғарблик ҳамкасбларимизнинг катта таъсири остида бўлган ишлаб чиқариш ва сотиш, молиявий, банк, логистика занжирларига қарамликдан халос бўлиш”, — деди Сергей Лавров Россия дипломатиясининг 2023 йилдаги фаолияти якунлари бўйича матбуот анжуманида.
Вазирнинг таъкидлашича, ҳозирданоқ мутасадди ташкилотлар белгиланган вазифалар ижроси юзасидан фаол иш олиб бормоқда.
Россия расмийлари мамлакат Украинадаги жанглар туфайли киритилган санкциялар оқибатларини енгиб чиққанини бир неча бор таъкидлаган. Владимир Путиннинг сўзларига кўра, Россия “ҳар томондан босим остида ва бўғилган” бўлишига қарамай, Европадаги биринчи иқтисодиётга айланишга муваффақ бўлди.
Изоҳ (0)