AQSH prezidentligiga Respublikachilar partiyasidan eng yosh nomzod, kelib chiqishi hindistonlik tadbirkor Vivek Ramasvami Ayova shtatidagi ilk boshlang‘ich saylovlarda muvaffaqiyatsizlikka uchragach, saylovoldi kompaniyasini yakunlashga qaror qildi.
CNN ma’lumotlariga ko‘ra, o‘zini Respublikachilar partiyasidan prezidentlikka nomzod deb ko‘rsatgan tadbirkor Vivek Ramasvami saylovda qatnashishdan bosh tortgan.
“Bugun rostini aytaman. Birinchi achchiq haqiqat — men uchun bu og‘ir bo‘ldi, tan olishim kerak — lekin biz buni (saylovda qatnashishdan bosh tortishni) har tomonlama o‘ylab ko‘rdik. Menimcha, bu to‘g‘ri. Biz bugun kutilgan syurprizga erisha olmadik”, — dedi Ramasvami Ayova shtatidagi saylovoldi shtab-kvartirasi vakillari bilan uchrashuvda.
Tadbirkor o‘z tarafdorlarini Ayova shtatidagi ilk kokuslarda g‘olib chiqqan sobiq prezident Donald Trampni qo‘llab-quvvatlashga chaqirdi. Trampga ovoz berishga undash uchun shaxsan Nyu-Hempshirga bormoqchi.
38 yoshli Vivek Ramasvami 2024-yil noyabrida bo‘lib o‘tadigan saylovlarda AQSH prezidentligiga nomzod bo‘ladigan eng yosh ishtirokchi edi. Saylovoldi tashviqotida u yoshlarning mehrini qozonishga intildi. Ramasvami Respublikachilar partiyasiga yangi, ilhomlantiruvchi milliy g‘oya kerakligini, chunki “e’tiqod, vatanparvarlik va mehnatsevarlik hozir tanazzulga yuz tutayotganini” ta’kidlagan. U boshqa respublikachilarni 1980-yillarda ommalashgan shiorlarni hamon takrorlab yurgani uchun tanqid qilgan. Shu bilan birga, Ramasvami Respublikachilar partiyasining Donald Trampga qarshi kurashishga urinmagan yagona vakili edi, aksincha, boshidanoq uni qo‘llab-quvvatlagan va hatto uni “XXI asrning eng buyuk prezidenti” deb atagan.
Eslatib o‘tamiz, Donald Tramp Ayova shtatidagi birinchi boshlang‘ich ichki partiya saylovlarida (kokuslar) g‘alaba qozondi. Respublikachilarning qariyb 51 foizi uni qo‘llab-quvvatlagan. Florida gubernatori Ron DeSantis ikkinchi o‘rinda, uni shtat respublikachilarining 21,3 foizi qo‘llab-quvvatladi. AQSHning BMTdagi sobiq elchisi Nikki Heyli 19,1 foiz ovoz bilan uchinchi o‘rinda.
Izoh (0)