Ukraina prezidenti Vladimir Zelenskiy Shveysariyadan yuqori darajadagi tinchlik konferensiyasi tashkil etishni so‘radi. Bern bu iltimosga ijobiy javob berdi. Bu haqda Shveysariya Konfederatsiyasi prezidenti Viola Amherd ma’lum qildi.
“Janob Zelenskiy Shveysariyadan yuqori darajadagi tinchlik sammitini tashkil qilishni so‘radi va men konferensiya tashkil etishga tayyor ekanligimizni tasdiqladim”, — dedi Amherd Bernda bo‘lgan matbuot anjumanida.
Uning ta’kidlashicha, konferensiyani tashkil etish bilan bog‘liq tafsilotlar chuqur o‘rganib chiqiladi.
Shveysariya hukumati veb-saytida e’lon qilingan press-relizda ta’kidlanganidek, ikki mamlakat rahbarlari Ukrainada tinchlikka erishish bo‘yicha “keyingi qadamlarni muhokama qilishdi”.
“Shveysariya Ukraina prezidentining iltimosiga ko‘ra tinchlik formulasi bo‘yicha yuqori darajadagi konferensiya tashkil etishga tayyorligini ma’lum qildi. Hozirda qo‘shimcha tafsilotlar muhokama qilinmoqda”, — dedi mamlakat rahbari.
Muzokaralarda, shuningdek, 14-yanvar kuni Davosda bo‘lib o‘tgan milliy xavfsizlik maslahatchilari darajasidagi to‘rtinchi uchrashuv muhokama qilindi. Har ikki delegatsiya “ushbu tadbirni tashkil etishdagi yaqin hamkorlikni yuqori baholadi”, deyiladi xabarda.
Zelenskiy Shveysariyaga 15-yanvar kuni tashrif bilan kelgan edi. U 16-yanvar kuni Davosda bo‘lib o‘tadigan Jahon iqtisodiy forumi yig‘ilishida nutq so‘zlashi rejalashtirilgan.
Izoh (0)