Husiylar Yaman qirg‘oqlari yaqinida AQSHga tegishli yuk tashuvchi kemaga raketa bilan zarba berdi. Bu haqda Reuters xabar berdi.
Britaniyaning Ambrey dengiz xavfsizligi kompaniyasi Yaman yaqinida AQSHga tegishli, Marshall orollari bayrog‘i ostida haraktlanuvchi kema nishonga olinganini ma’lum qildi.
“Raketa kema omborida yong‘inni keltirib chiqargan, biroq kema dengizga chiqishga yaroqliligicha qolmoqda”, — deyiladi xabarda.
Kompaniyaning qo‘shimcha qilishicha, kemaning Isroil bilan aloqasi yo‘q. Hujum amerikalik askarlarning Yamandagi husiylar pozitsiyalariga uyushtirgan hujumlari tufayli sodir etilgan. AQSH armiyasi markaziy qo‘mondonligi holat yuzasidan rasmiy munosabat bildirdi.
“15-yanvar kuni mahalliy vaqt bilan soat 16:00 atrofida Eron tomonidan qo‘llab-quvvatlangan husiylar Yamanning nazorati ostidagi hududlaridan kemaga qarshi ballistik raketa uchirdi va AQSHga tegishli va Marshall orollari bayrog‘i ostidagi Gibraltar Eagle konteyner kemasiga zarba berdi. Kemada jabrlanganlar yoki jiddiy vayronagarchiliklar qayd etilmagan va u o‘z yo‘lida davom etmoqda”, — deyiladi munosabatda.
Izoh (0)