Maldiv orollari respublikasi Hindistondan 15-martgacha harbiylarini orollardan olib chiqib ketishni so‘radi. Bu haqda Maldiv orollari prezidenti ma’muriyatining davlat siyosati bo‘yicha yordamchisi Abdulla Nozim Ibrohimga tayanib, Sun Online xabar berdi.
“Hindistonlik harbiy xizmatchilar Maldiv orollarida qolishi mumkin emas. Bu prezident Muhammad Muizzu va hozirgi maʼmuriyatning siyosati”, — dedi Ibrohim.
Unga ko‘ra, respublika rahbari Hindistondan 15-martgacha harbiylarni olib chiqib ketishni rasman so‘ragan. Ibrohimning eslatishicha, Male va Nyu-Dehli qo‘shinlarni olib chiqish bo‘yicha muzokaralar olib borish uchun yuqori darajadagi guruh tuzgan. Ushbu guruhning birinchi yig‘ilishi 14-yanvar kuni bo‘lib o‘tgan. Unda Hindiston harbiylarini olib chiqish muddati masalasi muhokama qilingan.
Maldiv orollarida Hindistonning 88 nafar harbiysi bor. Hindiston va Maldiv orollari mudofaa sohasida 1988-yildan beri hamkorlik qilib keladi, o‘shanda Hindiston armiyasi prezident Mumun Abdul Gayumning iltimosiga binoan, unga “Tamil ilam ozodlik yo‘lbarslari guruhining” to‘ntarishini yengishga yordam bergan.
Mashg‘ulotlar, jihozlar va qurol-yarog‘ bilan ta’minlash, inshootlar qurishni o‘z ichiga olgan ushbu hamkorlik 2017-2018 yillarga qadar Maldiv orollaridagi barcha siyosatchilar tomonidan qo‘llab-quvvatlangan.
Maldiv orollarining amaldagi prezidenti Muizzu o‘z saylovoldi kampaniyasida hind harbiylarini orol respublikasi hududidan olib chiqib ketishga va’da bergandi.
Izoh (0)