Hindiston qo‘mondonligi Kunlun va Himolay tog‘ tizimlari oralig‘ida joylashgan Ladakxa tumanida Xitoy bilan chegarani mustahkamlash doirasida turli razvedkachi dronlar va kuzatuv tizimlarini sotib olishni boshladi. Bu haqda Times of India xabar bergan.
“Harakat radiusi 15—20 kilometrdan 60—90 kilometrgacha bo‘lgan masofadan boshqariluvchi yangi kichik uchuvchisiz uchar qurilmalar baland tog‘li tumanlarda yopiq pozitsiyalardan o‘q otish uchun razvedka olib borish maqsadida artilleriya qismlariga kerak. Agar ular o‘zini yaxshi tomondan ko‘rsatsa, armiya ularni katta miqdorda sotib oladi”, — dedi nashr manbasi.
Xususan, armiya eng yaqin vaqt ichida 80 ta uchuvchisiz uchar qurilma, 10 ta avtonom uchar qurilma, 44 ta modernizatsiyalangan uzoq radiusli kuzatuv tizimlari va navigatsiya tizimlari uchun buyurtmalar bermoqchi.
Avvalroq, sentabr oyida Hindiston qo‘mondonligi kamikadze-dronlar va avtonom razvedkachi-zarbdor dronlar sotib olish niyati ma’lum bo‘lgan edi.
Shuningdek, Hindiston quruqlik qo‘shinlari qo‘mondoni Manoj Pande Ladakxaning sharqiy hududlarida harbiy infratuzilma faol ravishda kengaytirilayotganini ma’lum qilgandi. Xususan, 35 ming harbiy xizmatchi uchun turar-joy, 450 ta tank va boshqa zirhli texnikani joylashtirish uchun bazalar qurilmoqda, shuningdek, 350 ta turli artilleriya aslahalari va gaubitsalar ko‘chirib o‘tkazilgan.
Himolay tog‘larida Hindiston va Xitoy o‘rtasida aniq demarkatsiya qilingan chegara yo‘qligi tufayli, ko‘p sonli nizolar yuz bergan. Ikkala tomon to‘qnashuvlar uchun javobgarlik bir-biriga yuklagan.
Ladakxada vaziyat keskinlashuvi 2020-yil mayida Xitoy va Hindiston harbiylari o‘rtasidagi nizolar bilan boshlangan. Natijada ikkala tomon ham chegaradagi harbiy ishtirokini kuchaytirgan.
Chegara bo‘yicha bahslar
Hindiston va Xitoy chegarasidagi demarkatsiya chizig‘i 1962-yilda, chegara urushidan keyin o‘tkazishgan, uning uzunligi 4 ming kilometrdan oshadi. Chiziq bo‘yicha ikki davlatning haqiqiy chegarasi o‘tadi, ammo ushbu hududda ular o‘rtasida umumiy tan olingan chegara yo‘q, tomonlar bu hudud borasida bahslashib keladi.May oyida Hindiston TIV Nyu-Deli Pekin tomonidan bosib olingan deb hisoblaydigan bahsli hududda Xitoy Pangong ko‘lini kesib o‘tuvchi ikkinchi ko‘prikni qurayotganini ma’lum qilgandi. Iyunda AQSHning Tinch okeanidagi quruqlik qo‘shinlari qo‘mondoni Charlz Flinn Hindistonga tashrifi chog‘ida Xitoy tomonidan Hindiston bilan chegarada harbiy infratuzilma rivojlantirilishini “xavotirli” va “ibratli” deb atagan edi. Xitoy o‘shanda amerikalik generalning tashrifini “alangani puflab kuchaytirish”ga urinish deb baholagan edi.
Xitoy va Hindiston harbiylari o‘rtasida bir necha marta to‘qnashuvlar yuz bergan, ularning so‘nggilaridan biri 2020-yil iyunida bo‘lib o‘tgandi. Jang qariyb olti soat davom etgan, o‘qotar qurollar emas, faqat tayoq, tosh va mixli dubinkalar qo‘llanilgan. 20 nafar hind harbiysi halok bo‘lgan, Xitoy tomonidagi qurbonlar soni noma’lum. Hindiston TIV voqeada Xitoyni ayblagan.
O‘tgan yil dekabrida Pentagon demarkatsiya chizig‘i yaqinida xitoylik harbiylar to‘planganini qayd etgan, bu idora xodimlarida xavotir uyg‘otgan edi. Tashvishga Xitoy strategik bombardimonchilarining chegara yaqiniga joylashtirilishi sabab bo‘lgan. Vashington Nyu-Deli bilan “barcha darajalarda” muloqot olib bormoqda, AQSH Hindiston bilan Xitoy harbiylarining harakatlanishi haqidagi razvedka ma’lumotlari bilan ko‘proq bo‘lisha boshladi.
Mavzuga doir:
Izoh (0)