Qirg‘izistonga kirish qoidalariga rioya qilinmagani uchun 136 nafar O‘zbekiston fuqarosi chegaradan o‘tkazilmagan. Bu haqda Qirg‘iziston Milliy xavfsizlik davlat qo‘mitasi Chegara xizmati vakili Melis Pamirov ma’lum qildi.
Ta’kidlanishicha, mamlakatga kirishni rad etish to‘g‘risidagi qarorlar qonunbuzarlik emas. O‘zbekiston fuqarolari Qirg‘izistonda 60 kun davomida hech qanday to‘siqlarsiz qolishi mumkin, shundan so‘ng ular viza olish uchun ariza topshirishi kerak.
Qozog‘iston fuqarolari uchun yangilangan qoidalar 2024-yil sentyabridan kuchga kiradi. 60 kundan keyin ular Davlat ro‘yxatga olish xizmatida ro‘yxatdan o‘tishi kerak.
Qirg‘iziston Tashqi ishlar vazirligi konsullik boshqarmasi uchinchi kotibi Azamat Kalisbekov xorijiy fuqarolarning mamlakatda bo‘lishi tartibiga oid yangi nizomga o‘xshash qoidalar boshqa davlatlarda ham mavjudligini aytdi.
“Asosiy maqsad — xorijliklarning Qirg‘iziston hududida tegishli hujjatlarsiz cheksiz qolishiga chek qo‘yish. Qirg‘iziston-O‘zbekiston chegarasidan o‘tkazilmagan fuqarolar chiqish va kirish muddatlarini o‘zgartirmoqchi bo‘lgan. Endilikda bunday bo‘lmaydi. Ular qat’iy qoidalarga ko‘ra, tashrif maqsadini ko‘rsatishi va ruxsatnoma olishi kerak”, — dedi Tashqi ishlar vazirligi vakili.
Chet ellik fuqaro ro‘yxatdan o‘tayotganda yashash maqsadini va ish beruvchi bilan kelishuvini ko‘rsatishi kerak. Shunda u chiqish va kirishda muammoga duch kelmaydi.
“Agar mamlakatga vizasiz kirish huquqiga ega bo‘lmasangiz, boshqa davlatda bo‘lganingizda ham elektron vizaga murojaat qilishingiz mumkin”, — deyiladi xabarda.
Qirg‘izistonda bo‘lish tartibi
2023-yil oktyabr oyida chet el fuqarolarining Qirg‘izistonda bo‘lish qoidalari yangilangan edi. Agar chet el fuqarosi mamlakatda 60 kun davomida ro‘yxatdan o‘tmasdan qolsa, u viza uchun ariza topshirishi yoki shu vaqt ichida mamlakatni tark etishi kerak.
“Siz faqat 60 kundan keyin Qirg‘izistonga qaytishingiz mumkin bo‘ladi”.
Qirg‘izistonga 90 kungacha vizasiz tashrif buyurishi mumkin bo‘lgan fuqarolar uchun muddatlar “90/180” tamoyili bo‘yicha hisoblanadi.
Izoh (0)