Қирғизистонга кириш қоидаларига риоя қилинмагани учун 136 нафар Ўзбекистон фуқароси чегарадан ўтказилмаган. Бу ҳақда Қирғизистон Миллий хавфсизлик давлат қўмитаси Чегара хизмати вакили Мелис Памиров маълум қилди.
Таъкидланишича, мамлакатга киришни рад этиш тўғрисидаги қарорлар қонунбузарлик эмас. Ўзбекистон фуқаролари Қирғизистонда 60 кун давомида ҳеч қандай тўсиқларсиз қолиши мумкин, шундан сўнг улар виза олиш учун ариза топшириши керак.
Қозоғистон фуқаролари учун янгиланган қоидалар 2024 йил сентябридан кучга киради. 60 кундан кейин улар Давлат рўйхатга олиш хизматида рўйхатдан ўтиши керак.
Қирғизистон Ташқи ишлар вазирлиги консуллик бошқармаси учинчи котиби Азамат Калисбеков хорижий фуқароларнинг мамлакатда бўлиши тартибига оид янги низомга ўхшаш қоидалар бошқа давлатларда ҳам мавжудлигини айтди.
“Асосий мақсад — хорижликларнинг Қирғизистон ҳудудида тегишли ҳужжатларсиз чексиз қолишига чек қўйиш. Қирғизистон-Ўзбекистон чегарасидан ўтказилмаган фуқаролар чиқиш ва кириш муддатларини ўзгартирмоқчи бўлган. Эндиликда бундай бўлмайди. Улар қатъий қоидаларга кўра, ташриф мақсадини кўрсатиши ва рухсатнома олиши керак”, — деди Ташқи ишлар вазирлиги вакили.
Чет эллик фуқаро рўйхатдан ўтаётганда яшаш мақсадини ва иш берувчи билан келишувини кўрсатиши керак. Шунда у чиқиш ва киришда муаммога дуч келмайди.
“Агар мамлакатга визасиз кириш ҳуқуқига эга бўлмасангиз, бошқа давлатда бўлганингизда ҳам электрон визага мурожаат қилишингиз мумкин”, — дейилади хабарда.
Қирғизистонда бўлиш тартиби
2023 йил октябрь ойида чет эл фуқароларининг Қирғизистонда бўлиш қоидалари янгиланган эди. Агар чет эл фуқароси мамлакатда 60 кун давомида рўйхатдан ўтмасдан қолса, у виза учун ариза топшириши ёки шу вақт ичида мамлакатни тарк этиши керак.
“Сиз фақат 60 кундан кейин Қирғизистонга қайтишингиз мумкин бўлади”.
Қирғизистонга 90 кунгача визасиз ташриф буюриши мумкин бўлган фуқаролар учун муддатлар “90/180” тамойили бўйича ҳисобланади.
Изоҳ (0)