Qirg‘iziston hukumati kazinoga tashrif buyuradigan xorijliklar uchun vizalarni bekor qilmoqchi

Qirg‘izistondagi kazino va boshqa qimor o‘yinlariga tashrif buyuradigan chet el fuqarolari respublikaga kirish va ro‘yxatdan o‘tishda viza olish zaruratidan ozod qilinishi mumkin. Bu haqda Sputnik xabar berdi.

Mazkur qonun loyihasi Qirg‘iziston Iqtisodiyot va savdo vazirligi tomonidan taqdim etilgan. Unga ko‘ra, xorijliklar Qirg‘iziston hududiga vizasiz va ro‘yxatdan o‘tmasdan maxsus qimor o‘yinlari zonasiga tashrif buyurish uchun kirish, chiqish, ko‘chib o‘tish va qolish huquqiga ega bo‘ladi. Pasport nazoratidan o‘tishda ular uchun shaxsiy guvohnomani ko‘rsatish kifoya qiladi.

Maxsus qimor zonasi hududiga keluvchi xorijliklarning tashrif maqsadini belgilash mexanizmi, ularning shaxsiy va xizmat avtomashinasida kirishi, harakatlanishi va chiqishi tartibi Vazirlar Mahkamasi tomonidan belgilanadi. Chet el fuqarosi pasport nazoratidan o‘tishi va qat‘iy belgilangan chegarani kesib o‘tmagan holda maxsus qimor o‘yinlari zonasiga borishi talab qilinadi. Rasmiylar talablar terrorchilik va ekstremistik guruh a’zolarining Qirg‘izistonga kirib kelishi ehtimolini oldini olish maqsadida milliy xavfsizlikni hisobga olib, ishlab chiqiladi.

Iyul oyida Qirg‘izistonda kazinolar qonuniylashtirilgandi, biroq ular mamlakat fuqarolari uchun faoliyat yuritmaydi.

Mavzuga doir: Birlashgan Arab Amirliklarida birinchi kazino ochiladi