Samarqand viloyatining Oqdaryo tumanida 23 tup yong‘oq daraxti kesib tashlanishi oqibatida tabiatga 772 million so‘mdan ortiq zarar yetkazildi.
Bu holat Samarqand viloyati Ekologiya, atrof-muhitni muhofaza qilish va iqlim o‘zgarishi boshqarmasi, prokuratura, Milliy Gvardiya va IIB xodimlari tomonidan 19-noyabr kuni aniqlangan.
Boshqarma tashkil etgan tezkor ishchi guruh olib borgan o‘rganishlar natijasida shaxsini oshkor etishni istamagan Oqdaryo tumanida yashovchi mansabdorlar tumanning Daxbed mahallasi hududida joylashgan “Daxbed mo‘l hosil” va “Fazilov Sobir bog‘i” fermer xo‘jaligi yaqinidan o‘tuvchi mahalliy sug‘orish arig‘i yoqasida yashil belbog‘ (ihota) shaklida ekilgan qariyb 50 - 55 yoshlardagi 23 tup yong‘oq daraxtini kesishi oqibatida tabiatga 772 million 300 ming so‘m zarar keltirilgani maʼlum bo‘ldi.
Hozirda daliliy ashyolar va tegishli hujjatlar to‘planib, huquqni muhofaza qiluvchi organlarga taqdim etilgan.
Ma’lumot uchun, bugungi kunda Respublikada davlat o‘rmon fondiga kirmaydigan daraxt va butalarning kesilishiga qarshi moratoriy joriy etilishi munosabati bilan daraxtlarni tegishli ruxsatlarsiz kesish qatʼiyan man etilgan.
Izoh (0)