Тошкент шаҳар экология ва атроф-муҳитни муҳофаза қилиш бошқармаси бошлиғи Фарҳод Деҳқонов 9 сентябрь куни ҳибсга олиниб, орадан бир кун ўтганидан сўнг қўйиб юборилгани ҳақида хабар берилган эди.
У Жиноят кодексининг 205-моддаси 2-қисми «а» банди (ҳокимият ёки мансаб ваколатини суиистеъмол қилиш, давлат ёки жамиятга жуда кўп миқдорда зарар етказиш)да назарда тутилган жиноятни содир этганликда гумонланаётганди. Гўёки Чилонзор туманидаги 58 туп дарахтларнинг кесилишига эколог рухсат берган эмиш.
Бу воқеа жамоатчилик орасида норозиликларни келтириб чиқарди. Сабаби дарахтлар кесилишига асосий сабабчилар — ўша ҳудудда қурилиш қилишга рухсат берганлар четда қолиб, экологлар бош айбдор қилингани жамоатчилик вакилларини норози қилди.
Блогер Никита Макаренконинг ёзишича, мазкур ҳолат Президент администрацияси раҳбари Сардор Умурзоқов назоратида бўлиб, ҳозирда у мазкур масала бўйича тартиб ўрнатмоқда.
Депутатлар бу борада нима дейди?
Олий Мажлис Қонунчилик палатаси депутати Расул Кушербаев ушбу масалада қуйидагича фикр билдирди:
«Дарахткесарларга қарши курашадиган орган раҳбари ҳибсга олиниши жамоатчиликни ларзага келтирди. Айниқса, бу экология тизимидаги ходимларга шаштни сўндирадиган даражада қаттиқ зарба бўлди. Хайриятки, ҳаммаси ортда қолди. Экологлар, руҳни чўктирмаймиз!
Фурсатдан фойдаланиб, вазиятни холис баҳолаб, тўғри қарор қабул қилинишига ҳисса қўшган бош прокуроримизга миннатдорлик билдираман», — деб ёзган депутат.
Изоҳ (0)