Xorazm viloyati Yangiariq tumanida ekin yer maydoniga zarar yetkazgan fermer xo‘jaligi aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Yangiariq tuman bo‘limi tomonidan tergovga qadar tekshiruv o‘tkazilgan. Tekshiruvda tumandagi “G.K.” fermer xo‘jaligi masʼul shaxslari “Qarmish” mahallasi hududidagi yuqori bonitetli 2,3 gektar ekin yer maydonida o‘zboshimchalik bilan tuproqning unumdor qatlamini qazib olib, jami 1,2 milliard so‘m qishloq xo‘jaligi ishlab chiqarishi nobudgarchiligiga yo‘l qo‘yib, davlat va jamiyat manfaatlariga juda ko‘p miqdorda zarar yetkazgani aniqlangan.
Mazkur holat yuzasidan Jinoyat kodeksining 197-moddasi (yer, yer osti boyliklaridan foydalanish shartlarini yoki ularni muhofaza qilish talablarini buzish) va 229-moddasi (o‘zboshimchalik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi. Aprel boshlarida esa Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgandi.
Izoh (0)